सभापति देउवा पक्षले पनि आफूनिकट केन्द्रीय सदस्य र युवा भेला गर्ने

सेतोपाटी संवाददाता

काठमाडौं, पुस २४

नेपाली कांग्रेसका सभापति शेरबहादुर देउवा पक्षले पनि आफूनिकट केन्द्रीय सदस्यहरू र युवाहरूको भेला गर्ने तयारी गरेका छन्।

आज सभापति देउवा निवासमा भएको आफूनिकट नेताहरू तथा भ्रातृ संस्थाका नेताहरूसहितको बैठकले केन्द्रीय सदस्य, जिल्ला सभापति र युवा भेला गर्ने निर्णय गरेको एक नेताले जानकारी दिए।

‘भोलि बिहान नयाँ बानेश्वर स्थित एक होटलमा केन्द्रीय सदस्यहरूको भेला गर्ने तय भएको छ,’ ती नेताले भने। भेलामा सभापति तथा कार्यवाहक सभापतिलाई भने नबोलाइने ती नेताको भनाइ छ।

साथै चुनावअघि महाधिवेशनका पक्षमा उभिएका सभापति देउवानिकट ३० जना केन्द्रीय सदस्यहरूलाई पनि समेट्ने तयारी भइरहेको छ। यस्तो भेला सभापति देउवा पक्षनिकटबीच नै यसअघि बेग्लाबेग्लै ठाउँमा हुने गर्दथ्यो।

यस्तै पुस २७ गते केन्द्रीय कार्यालय सानेपामा तरूण भेला हुने भएको छ। विशेष महाधिवेशन उद्घाटन सोही दिन हुनेछ। उक्त कार्यक्रमलाई लक्ष्य गरी सभापति देउवा पक्षले युवा भेला गर्न लागेका छन्।

सभापति र कार्यवाहक सभापतिको असहमतिबीच महामन्त्रीद्वय गगन थापा र विश्वप्रकाश शर्माले पुस २७ र २८ गते विशेष महाधिवेशन आह्वान गरेका छन्। विशेष महाधिवेशन विधानअनुसार बाध्यकारी रहेको र औचित्य नभएको भन्दै संस्थापन र महामन्त्रीहरूबीच मतभेद छ।

सभापति देउवा पक्षले पुस २८ गते आफूनिकट जिल्ला सभापति भेला पनि गर्ने तयारी गरेका छन्। जिल्ला सभापतिहरूले धमाधम विशेष महाधिवेशनका पक्षमा विज्ञप्ति जारी गर्न लागेपछि सभापति देउवा पक्षले पनि भेला आयोजना गर्न लागेका छन्।