अमेरिकी राष्ट्रपति डोनाल्ड ट्रम्पले सन् २०२६ मा हुने कंग्रेसको चुनावमा पार्टीले जित्नै पर्ने बताएका छन्।
मंगलबार रिपब्लिकन सांसदहरूको भेलामा राष्ट्रपति ट्रम्पले आगामी मध्यावधि चुनावमा पार्टीले नजिते डेमोक्र्याटहरूले आफूलाई नछाड्ने बताएका हुन्।
'हामीले मध्यावधि चुनाव जित्नैपर्छ। जितेनौं भने उनीहरूले कुनै न कुनै बहानामा मलाई महाभियोग लगाउँछन्। म फेरि महाभियोगमा पर्छु,' ट्रम्पको भनाइ उद्धृत गर्दै अन्तर्राष्ट्रिय समाचार संस्था रोयटर्सले लेखेको छ।
अमेरिकी कंग्रेस (प्रतिनिधिसभा)मा ट्रम्पको रिपब्लिकन पार्टीसँग अत्यन्त कमजोर बहुमत छ। त्यसकारण पार्टीभित्रको आन्तरिक मतभेद त्यागेर आफ्ना नीतिहरू प्रभावकारी रूपमा जनतामाझ लैजान ट्रम्पले रिपब्लिकन सांसदहरूलाई आग्रह गरेका हुन्।
उनले लैंगिक नीति, स्वास्थ्य सेवा र निर्वाचनको निष्पक्षताजस्ता विषयमा पार्टी एकजुट भएर जनताको समर्थन जित्नुपर्ने बताए।
'राष्ट्रपति चुनाव जित्नेले मध्यावधि चुनाव हार्छ भन्ने दाबी गरिरहेका छन्,' ट्रम्पले भने, 'म अमेरिकी जनताको मनोविज्ञान के हो भनेर बुझ्नै सक्दिनँ।”
उनले समस्या डेमोक्र्याटबाट विरासतमा पाएको दाबी गर्दै रिपब्लिकनहरूले शेयर बजारको मजबुत प्रदर्शनलाई चुनावी मुद्दा बनाउनुपर्ने बताए। तर महँगी र जीवनयापन खर्चबारे खासै ट्रम्पले खासै टिप्पणी नगरेको रोयटर्सले जनाएको छ।
उनले सन् २०२१ जनवरी ६ मा आफ्ना समर्थकहरूले अमेरिकी संसद भवनमा गरेको आक्रमणको पनि संक्षिप्त मात्र उल्लेख गरे। उता, डेमोक्र्याटहरूले भने उक्त घटनाको पाँचौँ वर्षगाँठमा रिपब्लिकनहरूले इतिहास ‘मेट्ने’ प्रयास गरिरहेको आरोप लगाएका छन्।
ट्रम्पले २०१७–२०२१ को पहिलो कार्यकालमा डेमोक्र्याट बहुमत रहेको प्रतिनिधिसभाबाट दुईपटक महाभियोग खेपेका थिए।
युक्रेन नीति र जनवरी ६ को दंगासँग सम्बन्धित मुद्दामा लगाइएका ती महाभियोगमा सिनेटले उनलाई उन्मुक्ति दिएको थियो।
दोस्रो कार्यकालमा पनि केही डेमोक्र्याट सांसदहरूले ट्रम्पमाथि शक्ति दुरुपयोगको आरोपसहित महाभियोग प्रस्ताव दर्ता गरिसकेका छन्, जसलाई ह्वाइट हाउसले अस्वीकार गरेको छ।
हाल रिपब्लिकनसँग प्रतिनिधिसभामा पाँच सिटको मात्र बहुमत छ।
ट्रम्पले आप्रवासन, सैन्य कारबाही र संघीय नियमनजस्ता क्षेत्रमा कार्यकारी अधिकार विस्तार गर्दै आएका छन्।
साथै उनी विभिन्न प्रकरणमा पनि मुछिएपछि पार्टीभित्रै ट्रम्पको आलोचना बढेको छ।
भन्सारसम्बन्धी उनको कदमले कंग्रेसको अधिकार अतिक्रमण गरेको कि नगरेको भन्ने विषयमा सर्वोच्च अदालतको महत्वपूर्ण फैसला आउन बाँकी छ।
यद्यपि रिपब्लिकन सांसदहरूले अहिलेसम्म ट्रम्पप्रति ठूलो निष्ठा देखाउँदै आएका छन्।
सबै प्रतिनिधिसभा सिट र सिनेटका एक–तिहाइ सिटका लागि हुने सन् २०२६ को निर्वाचनलाई ट्रम्पले ऐतिहासिक विजयमा बदल्ने दाबी गरे पनि, उनले पार्टीभित्रैबाट चुनौती सामना गर्नुपर्ने संकेत पनि दिएको रोयटर्सले जनाएको छ।
-1756446574.jpg)
-1746009348.jpg)
