नेपाली कांग्रेसका महामन्त्री विश्वप्रकाश शर्माको निर्वाचन क्षेत्र झापा क्षेत्र नम्बर १ अन्तर्गतका पार्टी संरचनाहरूले विशेष महाधिवेशनलाई पार्टी जिवनको निर्णायक मोडको रूपमा व्याख्या गर्दै प्रतिनिधिहरूलाई काठमाडौं उपस्थित हुन आह्वान गरेका छन्।
झापा१ क्षेत्रीय समिति र मेचीनगर नगर समितिले छुट्टाछुट्टै विज्ञप्ति जारी गर्दै विशेष महाधिवेशन पार्टी रूपान्तरण, आन्तरिक लोकतन्त्र सुदृढीकरण र संगठनात्मक सुधारका लागि अनिवार्य रहेको जनाएका छन्।
क्षेत्र र नगर समितिले पार्टीका २ हजार ४८८ जना, अर्थात् ५४.५७ प्रतिशत महाधिवेशन प्रतिनिधिहरूले हस्ताक्षर गरी विशेष महाधिवेशनको माग गरेको र पार्टी विधानअनुसार आवश्यक संख्या पूरा भइसकेकाले यो माग बाध्यकारी रूपमा कार्यान्वयन हुनुपर्ने बताएका छन।
विज्ञप्तिमा यही पौष २७ र २८ गते काठमाडौंमा विशेष महाधिवेशन हुने सुनिश्चित भइसकेको उल्लेख गर्दै, त्यसलाई सफल बनाउन सबै नेता–कार्यकर्ताको साझा जिम्मेवारी रहेको जनाइएको छ।
'ऐतिहासिक दोस्रो विशेष महाधिवेशनमा सहभागी भई परिवर्तनको पक्षमा उभिन, पार्टीको आन्तरिक लोकतन्त्र संस्थागत गर्न र आगामी दिनको ‘नवीन कांग्रेस’ निर्माणमा सहभागी हुन प्रतिनिधिहरूलाई आग्रह गरिएको छ।
मेचीनगर नगर समितिको विज्ञप्तिमा उपसभापति धनकाजी खत्री, योगेन्द्र थापा, नगर सचिव मुकेश तुम्रोक र मनोज घिमिरेको हस्ताक्षर रहेको छ।
नेपाली कांग्रेस झापा क्षेत्र नम्बर १ क्षेत्रीय समितिले पनि विशेष महाधिवेशनलाई पार्टी इतिहासकै अत्यन्त महत्वपूर्ण मोडको रूपमा चित्रण गर्दै प्रतिनिधिहरूलाई सक्रिय सहभागिताका लागि आह्वान गरेको छ। क्षेत्रीय समितिका अनुसार पार्टीको वैचारिक स्पष्टता, संगठनात्मक एकता, आन्तरिक लोकतन्त्र र समसामयिक राजनीतिक चुनौतीहरूमाथि गम्भीर निर्णय लिन यही महाधिवेशन निर्णायक हुने छ।
क्षेत्रीय समितिले झापा क्षेत्र नम्बर १ बाट निर्वाचित सम्पूर्ण महासमिति सदस्य तथा महाधिवेशन प्रतिनिधिहरूको सक्रिय, जिम्मेवार उपस्थितिलाई अपरिहार्य बताएको छ।
झापा क्षेत्र नम्बर १ क्षेत्रीय समितिका सभापति इन्द्रबहादुर बुढाथोकीको हस्ताक्षरसहित जारी विज्ञप्तिमा विशेष महाधिवेशनमार्फत पार्टीलाई थप सशक्त, विश्वसनीय र आम नेपालीका लागि भरोसायोग्य बनाउने अवसर रहेको उल्लेख गरिएको छ।
-1746009348.jpg)
