सर्वोच्च अदालतका पूर्वन्यायाधीश ईश्वर खतिवडाले कांग्रेस विशेष महाधिवेशनबारे टिप्पणी गर्दै 'विधिसम्मत रूपमा हुनुपर्ने महाधिवेशन हुन नदिनु लोकतान्त्रिक मूल्य-मान्यताको प्रतिकूल कदम' भनेका छन्।
पूर्वन्यायाधीश खतिवडाले शुक्रबार सामाजिक सञ्जाल फेसबुकमा आफ्नो टिप्पणी सार्वजनिक गरेका हुन्।
उनी लेख्छन्, 'नेपाली कांग्रेसले विशेष महाधिवेशनको पक्षमा हस्ताक्षर गर्ने महाधिवेशन प्रतिनिधिहरूलाई हस्ताक्षर फिर्ता लिन अनुरोध गर्ने निर्णय गरेछ। यो खबर सुनेर अचम्म लाग्यो। विधिसम्मत रूपमा हुनुपर्ने महाधिवेशन हुन नदिने गरी सुरूदेखि भएका कार्य लोकतान्त्रिक मूल्य-मान्यता प्रतिकूलको कदम हो। अहिले आएर हस्ताक्षर फिर्ता लिन लगाउने भनी गरिएको निर्णय महाधिवेशन प्रतिनिधि र आम कार्यकर्ताहरूलाई दिइएको अनुचित दबाब र धम्की पनि हो।'
विधिसम्मत रूपमा माग भएपछि विशेष महाधिवेशन गर्नु आवश्यक र अनिवार्य भएको उनले बताएका छन्।
संस्थापन समूहको स्वार्थ, अहम् र फरक विचारलाई दबाउने र दमन गर्ने अलोकतान्त्रिक हठका कारणबाट विशेष महाधिवेशनलाई छल्न र बिथोल्न खोजिएको उनले उल्लेख गरेका छन्।
'हामी आम जनताले यसलाई लोकतन्त्र भनेर कसरी बुझ्ने? यो भाँडतन्त्र भएन र?' पूर्वन्यायाधीश खतिवडा लेख्छन्, 'यस्तै शैली र पृष्ठभूमिमा 'झोले र चम्चे' भाष्यको निर्माण भएको होइन र? यी र यस्तै अरू केही प्रश्नहरूबीच म मेरो देशको राजनीतिक भविष्य नियाल्दै छु।'
पूर्वन्यायाधीश खतिवडाले फेसबुकमा लेखेको विचार यस्तो छ —
म कुनै राजनीतिक नेता पनि होइन, कुनै पनि राजनीतिक दलको कार्यकर्ता पनि होइन। संविधान, कानुन र राजनीतिशास्त्रको अध्येता नेपाली नागरिक हुनुको नाताले मुलुकको राजनीतिक प्रणाली र क्रियाकलापप्रति मेरो जिज्ञासा स्वाभाविक रूपमा रहने गर्दछ। त्यसैले एउटा विचार/जिज्ञासा यहाँ सम्प्रेषण गरेको छु।
२४ पुस, २०८२ को समाचार हेरियो। नेपाली कांग्रेसले विशेष महाधिवेशनको पक्षमा हस्ताक्षर गर्ने महाधिवेशन प्रतिनिधिहरूलाई हस्ताक्षर फिर्ता लिन अनुरोध गर्ने निर्णय गरेछ। यो खबर सुनेर अचम्म लाग्यो। विधिसम्मत रूपमा हुनुपर्ने महाधिवेशन हुन नदिने गरी सुरूदेखि भएका कार्य लोकतान्त्रिक मूल्य-मान्यता प्रतिकूलको कदम हो। अहिले आएर हस्ताक्षर फिर्ता लिन लगाउने भनी गरिएको निर्णय महाधिवेशन प्रतिनिधि र आम कार्यकर्ताहरूलाई दिइएको अनुचित दबाब र धम्की पनि हो।
यो कस्तो लोकतन्त्र हो? विधिसम्मत रूपमा विशेष महाधिवेशनको माग भएपछि विशेष महाधिवेशन गरिनु आवश्यक र अनिवार्य थियो। संस्थापन समूहको स्वार्थ, अहम् र फरक विचारलाई दबाउने र दमन गर्ने अलोकतान्त्रिक हठको कारणबाट विशेष महाधिवेशनलाई छल्न र बिथोल्न खोजियो।
हामी आम जनताले यसलाई लोकतन्त्र भनेर कसरी बुझ्ने? यो भाँडतन्त्र भएन र? यस्तै शैली र पृष्ठभूमिमा 'झोले र चम्चे' भाष्यको निर्माण भएको होइन र? यी र यस्तै अरू केही प्रश्नहरूबीच म मेरो देशको राजनीतिक भविष्य नियाल्दै छु।
-1746009348.jpg)
