नेपाली कांग्रेसका नेता उदयशमशेर राणाले पार्टीका कुनैपनि नेता कार्यकर्ताले पार्टी विभाजन होस् भन्ने नचाहेको बताएका छन्।
शुक्रबार सञ्चारकर्मीहरूसँग कुरा गर्दै नेता राणाले आसन्न प्रतिनिधि सभा निर्वाचन कांग्रेसका लागि ठूलो चुनौती रहेको उल्लेख गर्दै सामना गर्न पार्टीभित्र आन्तरिक एकता अपरिहार्य रहेको बताएका हुन्।
उनले पार्टी कुनै पनि हालतमा विभाजन हुनेमा विश्वस्त नरहेको बताए
‘फागुन २१ गतेको निर्वाचन अगाडि पार्टीभित्र केही समस्याहरु हामीले देखेका छौं। अब विषेश महाधिवेशनको आह्वान पनि भएको छ। पार्टी विभाजित हुने कुरामा म विश्वास गर्दिनँ,’ उनले भने, ‘कुनै पनि कांग्रेसका नेता कार्यकर्ताले पनि कांग्रेस फुटोस् भन्ने चाहेका छैनन्। तर चुनाव अगाडि हामी सबै एउटै ठाउँमा उभिएर यो जटिल अवस्थाको सामना गर्नुपर्ने अवस्था छ।’
उनले पार्टीका नेता कार्यकर्तालाई अग्र नभई संयमित हुन आग्रह गर्दै पार्टीभित्रको समस्या समाधान गर्न मध्यमार्गी बाटो अपनाउन समेत अपिल गरे।
‘नेपाली कांग्रेसका सबै नेता र कार्यकर्ताहरूलाई धेरै उग्र भएर हामी नहिडौं भनेर आग्रह पनि गर्न चाहान्छु। यसरी उग्र भएर राम्रो नतिजा दिँदैन। सबैले संयमित भएर यो विषेश महाधिवेशनलाई सेफ ल्याण्ड गराउन जरूरी देखिएको कारणले हामीले यसको लागि मध्यमार्गी बाटो खोज्नुपर्छ। हामी सबैलाई अपिल पनि गर्न चाहन्छौं। विषेश महाधिवेशनलाई सफल पार्नको लागि सहयोग गर्नुहोस्,’ उनले भने।
-1746009348.jpg)
