भारतीय प्रधानमन्त्री नरेन्द्र मोदीले अमेरिकी राष्ट्रपति डोनाल्ड ट्रम्पलाई फोन नगरेका कारण गत वर्ष भारतसँगको व्यापार सम्झौता हुन नसकेको अमेरिकी वाणिज्य मन्त्री हावर्ड लुटनिकले दाबी गरेका छन्।
एउटा पडकास्टमा बोल्दै लुटनिकले अमेरिकासँग व्यापार सम्झौता गर्न भारतलाई तीन वटा शुक्रबारको समय दिइएको र सम्झौता टुङ्ग्याउन मोदीले ट्रम्पलाई फोन गर्नुपर्ने सर्त राखेको बताएका छन्।
लुटनिकका अनुसार भियतनाम वा इन्डोनेसियासँग सन् २०२५ को मध्यतिर भएका सम्झौताहरूभन्दा पहिले नै भारतसँगको सम्झौता सम्पन्न हुने अपेक्षा गरिएको थियो।
तर भारतीय पक्षले मोदी र ट्रम्पबीच कुराकानी गराउन असहज मानेका कारण सो प्रयास असफल भएको उनले जनाएको भनेर ब्लुमबर्गले लेखेको छ।
'मैले भनेको थिएँ ‘तिमीहरूले मोदीलाई कुरा गराउनुपर्छ, सबै तयारी भइसकेको छ। मोदीले राष्ट्रपतिलाई फोन गर्नुपर्छ।’ तर उनीहरू त्यसो गर्न असहज मानिरहेका थिए। त्यसैले मोदीले फोन गरेनन्,' लुटनिकले शुक्रबार प्रशारित सो पडकास्टमा भने।
यस विषयमा भारतले तत्काल कुनै प्रतिक्रिया भने जनाएको छैन।
अमेरिकासँग व्यापार सम्झौता गर्न बाँकी रहेका प्रमुख देशहरूमध्ये भारत पनि एक हो।
अमेरिकी राष्ट्रपति ट्रम्पले भारतमा बनेका सबै सामानमा ५० प्रतिशत भन्सार शुल्क लगाएका छन्।
ट्रम्पले गत जुलाईको अन्त्यमा भारतबाट आयात हुने सबै सामानमा २५ प्रतिशत भन्सार लगाउने घोषणा गरेका थिए। त्यसपछि भारतले अझै रूसी कच्चा तेल किनिरहे अगस्टको अन्त्यदेखि लागू हुने गरी भारतबाट आयात हुने सबै सामानमा थप २५ प्रतिशत भन्सार शुल्क लगाउने चेतावनी दिएका थिए।
भारतले रूसी तेल किन्न बन्द नगरेपछि गत वर्षको अगस्ट २७ देखि भारतीय सामानमा ५० प्रतिशत भन्सार शुल्क कार्यान्वयनमा आएको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
