नेकपा (एकीकृत समाजवादी) पुनर्गठन अभियानका नेता घनश्याम भूसालले नेपाली कांग्रेसको विशेष महाधिवेशनको सफलताले नेपाली राजनीतिमा ठूलो महत्व राख्ने बताएका छन्।
शनिबार फेसबुकमा लामो स्टाटस लेख्दै नेता भूसालले गगन थापा र विश्वप्रकाश शर्माको नेतृत्वमा हुने विशेष महाधिवेशनको मामिला उनीहरूको भए पनि यसले नेपाली राजनीतिमा गतिरोध तोड्न असाधारण योगदान गर्ने बताएका हुन्।
'त्यसले नेपाली कांग्रेसलाई कांग्रेसीहरूको बनाउन सक्यो भने कम्युनिस्ट पार्टी पनि कम्युनिस्टहरूकै हुन कर लाग्छ। बीच सडकमा दिनदहाडै भैरहेको तथाकथित विचारहरूको खुलेआम खरिद बिक्री रोकिने छ,' उनले शुभकामना दिँदै लेखेका छन्।
भूसालले नेपालको राजनीति कम्युनिस्ट र कांग्रेस नेताहरूको अन्तर्पार्टी सिन्डिकेटको कब्जामा रहेको बताएका छन्।
'कम्युनिष्ट पार्टी एमालेहरू र माओवादीहरूको भन्दा बढी श्रीमान् देउवा र उहाँको गुटका मानिसहरूको ज्युनीजस्तो भएको छ। कम्युनिष्ट पार्टीका नीतिहरूमा श्री देउवाजीको प्रभाव बढि हुन्छ। नेपाली कांग्रेसले के गर्नु पर्छ भन्ने कुरा कमरेड ओली वा प्रचण्डहरूको स्वार्थबाट प्रभावित हुन्छ। अर्थात्, नेपालको राजनीति कम्युनिष्ट र कांग्रेसी नेताहरूको अन्तरपार्टी सिण्डिकेटको कब्जामा छ,' उनले भनेका छन्।
कम्युनिस्ट र कांग्रेस जति झगडा गरे पनि खास ठाउँमा त्यो सिन्डिकेटले सबैलाई एक ठाउँमा ल्याउने उनको भनाइ छ। र त्यसको सत्ता दोहन एउटा मात्रै ध्येय हुने गरेको उनको भनाइ छ।
'त्यस सिण्डिकेटलाई मैले करिब २५ वर्षदेखि दलाल पुँजीवाद भन्दै आएको छु। आफ्नै पार्टीभित्र कसैलाई नसहने तिनीहरू अर्को पार्टीका नेतासँग कसरी मिलिजुली बस्छन् र बाँडीचुँडी खान्छन् भन्ने कुरा हामीले भोग्दै आएका छौं,' उनले भनेका छन्।
गगन-विश्वप्रकाशले आयोजना गरेको विशेष महाधिवेशन वर्षौंदेखिको 'सिन्डिकेट' तोड्न महत्त्वपूर्ण हुने भूसालले बताएका छन्।
-1759135540.jpeg)
-1746009348.jpg)
