नेपाल कम्युनिस्ट पार्टी (एमाले) को केन्द्रीय कमिटी बैठक जारी छ।
ललितपुरको एकान्तकुनास्थित म्याजेष्टिक ग्राण्ड प्यालेस बैठकमा विभिन्न एजेन्डामा छलफल हुने बताइएको छ।
उक्त बैठकमा समसामयिक राजनीतिक घटनाक्रम, पार्टीको भूमिका तथा आसन्न आमनिर्वाचनको तयारीका विषयमा गहन छलफल हुने जनाइएको छ।
बैठकको सुरूआत राष्ट्रको सम्मानमा राष्ट्रगान तथा सहिदहरूको सम्मानमा मौन धारणबाट हुनेछ। त्यसपछि पार्टी अध्यक्ष केपी शर्मा ओलीले केन्द्रीय कमिटीको प्रथम बैठकयताका राजनीतिक घटनाक्रम, पार्टीले खेलेको भूमिका र आगामी आमनिर्वाचनको तयारीबारे विस्तृत सम्बोधन गर्ने कार्यसूचीमा उल्लेख छ।
बैठकमा दोस्रो विधान महाधिवेशन (२०–२२ भदौ २०८२) र एघारौं राष्ट्रिय महाधिवेशन (मंसिर २७– पुस ३ ) ले पार्टी विधानमा गरेका संशोधनका आधारमा पार्टी नियमावलीमा आवश्यक संशोधन प्रस्ताव प्रस्तुत गरी पारित गर्ने कार्यसूची छ।
यस्तै, एघारौं राष्ट्रिय महाधिवेशनको आम्दानी–खर्चसम्बन्धी मोटो विवरण पनि बैठकसमक्ष प्रस्तुत गरिनेछ।
पार्टीका अनुसार पार्टीको एघारौं राष्ट्रिय महाधिवेशन चितवनमा सम्पन्न भएको दसौ राष्ट्रिय महाधिवेशनको तुलनामा किफायती भएको छ र आवास तथा यातायात खर्च नलाग्दा करिब ३ करोड रुपैयाँ कम खर्च भएको छ।
बैठकले केन्द्रीय सचिवालयका पुस १२ र पुस २२ मा सम्पन्न दुई बैठकबाट भएका निर्णयहरूको अनुमोदन पनि गर्नेछ। ती निर्णयहरू अन्तरपार्टी निर्देशन–१ मार्फत कार्यान्वयनमा गइसकेका छन्।
यसैगरी, एघारौं राष्ट्रिय महाधिवेशनबाट निर्वाचित केन्द्रीय कमिटीका पदाधिकारी तथा सदस्यहरूलाई पार्टी अध्यक्ष ओलीले प्रमाण–पत्र वितरण गर्ने कार्यक्रम छ। बैठकको अन्त्यमा समसामयिक विषयमा विविध प्रस्ताव प्रस्तुत गरी पारित गरिने जनाइएको छ।
-ink-1766136526.jpeg)
-1746009348.jpg)
