नेपाली कांग्रेसका सभापति शेरबहादुर देउवाको सचिवालयले विशेष महाधिवेशन निम्तो पत्र बुझ्न अस्वीकार गरेको छ।
विशेष महाधिवेशन अतिथि स्वागत तथा सत्कार समितिका संयोजक रामपल्टन साह निम्तो पत्र बुझाउन आज दिउँसो पार्टी सभापति देउवा निवास महाराजगञ्ज पुगेका थिए।
सभापति देउवालाई विशेष महाधिवेशन उद्घाटनका लागि निम्तो पत्र पठाइएको थियो। तर देउवाका स्वकीय सचिव भानु देउवाले पत्र पढे पनि सभापतिलाई भेट्न नदिई विशेष महाधिवेशन पक्षधर नेता साहलाई फिर्ता पठाएका हुन्।
‘सभापतिजीको घरमा गएको थिएँ। त्यहाँ बैठक चलिरहेको रहेछ। आधा घन्टा कुरेँ, मुख्यसचिव कृष्णप्रसाद पौडेल पनि त्यहीँ हुनुहुँदो रहेछ, उहाँलाई चिठी दिएँ। मलाई किन चिठी दिने सभापतिजीलाई नै दिनुस् भन्नुभयो। त्यसको केहीबेरमा सभापति देउवाको स्वकीय सचिव भानुजी बाहिर निस्कनुभयो, उहाँलाई चिठी दिएँ, पढ्नुभयो, पढेपछि उहाँले चिठी मेरै खल्तीमा हाल्नुभयो र तपाईंलाई लाज लाग्दैन यो गर्दा जानुस् बाहिर भन्नुभयो,’ साहले सेतोपाटीसँग भने।
यो कुराकानी हुँदै गर्दा त्यहाँ सहमहामन्त्री उमाकान्त चौधरी आइपुगेको उनले बताए।
‘हाम्रो सहमहामन्त्री त्यही बेला निस्कनुभयो, निम्तो पत्र पढेर आफ्नो खल्तीमा हाल्नुभयो,’ उनले भने।
त्यसपछि आफू अरू नेताका घरमा पनि निम्तो पत्र दिनुछ भन्दै निस्किएको उनले बताए।
त्यसपछि कार्यवाहक सभापति पूर्णबहादुर खड्काको घरमा पुगेर चिठी दिएको उनले बताए।
‘कार्यवाहक सभापतिजीकोमा पनि बैठक चलिरहेको रहेछ। उहाँको स्वकीय सचिवले चिठी लिनुभयो, कार्यवाहकलाई भेट्ने भए आधा घन्टा लाग्छ भन्नुभयो, समय अभाव छ, अरू नेतालाई पनि निम्तो दिनुछ भनेर म निस्किएँ,’ उनले भने।
त्यसपछि नेता नारायण खड्का लगायतको घरमा पनि निम्तो पत्र छाडेको उनले बताए।
‘पूर्वमहामन्त्री शशांक कोइरालालाई भेटेरै निम्तो पत्र दिएँ, निम्तो पत्र बुझेपछि उहाँले गुड भन्नुभयो,’ उनले भने।
कांग्रेसको विशेष महाधिवेशन पुस २७ र २८ गते काठमाडौंको भृकुटीमण्डपमा हुँदैछ।
संस्थापन पक्षका अधिकांश नेताहरूको विरोधबीच महामन्त्रीद्वय गगन थापा र विश्वप्रकाश शर्माले ५४ प्रतिशत महाधिवेशन प्रतिनिधिहरूको माग बाध्यकारी रहेको भन्दै विशेष महाधिवेशन आयोजना गरेका हुन्।
विशेष महाधिवेशनका लागि महाधिवेशन प्रतिनिधिहरू काठमाडौं आइसकेका छन्।
-1746009348.jpg)
