केन्द्रीय समितिमा कुलमानले भने- अपमानित महसुस गरेँ

सेतोपाटी संवाददाता

काठमाडौं, पुस २६

उज्यालो नेपाल पार्टीका अध्यक्ष कुलमान घिसिङले रास्वपामा आफूले अपमानित महसुस गरेको केन्द्रीय समिति बैठकमा बताएका छन्।

रास्वपा सभापति रवि लामिछानेले कुलमानसँगको एकता भंग भएको घोषणा गरेपछि उज्यालो नेपाल पार्टीको केन्द्रीय समिति बैठकले घिसिङलाई अध्यक्ष नियुक्त गरेको थियो।

बैठकमा घिसिङले उज्यालो नेपालमै आबद्ध कार्यकर्ताहरूको भावना अनुरूप आफूले मन्त्री हुँदा पनि रास्वपा नेताका चोटाकोठामा जानुपरेको बताए।

त्यसपछि एकता भए पनि सम्मानित सिट बाँडफाँट नभएको उनले बताएका छन्।

'एकताको भावना अनुरुप सम्मानित सिट बाँडफाँट भएन। समानुपातिकमा हामीले पठाएका नाम काटियो। हालेका नाम तल पारियो। मैले अपमान महसुस गरेँ त्यसकारण एक ठाउँमा रहन सकिएन। अब उज्यालो नेपाललाई अगाडि बढाउने हो,' उनको भनाई उद्धृध गर्दै एक केन्द्रीय सदस्यले भने।

बैठकपछि आयोजित पत्रकार सम्मेलनमा पनि घिसिङले ‍तिनै कुराहरू राखेका थिए।

उनले एकता पनि एकतर्फी ढंगले भंग गरिएको आरोप लगाएका छन्।

यता रास्वपाका एक नेता कुलमानले वरिष्ठ उपसभापतिसहित कम्तीमा पाँच पदाधिकारी, सात बढी सचिवालय र प्रत्यक्षमा जित्ने सिट र राजकीय पदसमेत भागबन्डा गरेर जानुपर्ने माग गरेको बताउँछन्।

पार्टीको नाममा उज्यालो कतै अटाउनुपर्ने नयाँ माग राख्दै सहमतिबाट पछि हटेको रास्वपाका ती नेताले भने।