नेपाली कांग्रेसको दोस्रो विशेष महाधिवेशन आइतबारदेखि सुरू हुँदैछ।
काठमाडौंको भृकुटीमण्डपमा विशेष महाधिवेशनको उद्घाटन समारोह दिउँसो १ बजे हुनेछ।
त्यसअघि काठमाडौंका विभिन्न पाँच स्थानबाट जुलुस निकालिनेछ। सुन्धारा, रत्नपार्क, शंकरदेव क्याम्पस, कमलपोखरी र कुपन्डोलबाट निस्कने जुलुस भृकुटीमण्डप पुग्नेछ।
विशेष महाधिवेशनको उद्घाटन सत्रको सभापतित्व काठमाडौंको जिल्ला सभापति सबुज बानियाँले गर्नेछन्।
२०१४ सालमा मोरङमा भएको पहिलो विशेष महाधिवेशनको उद्घाटनको सभापतित्व त्यतिबेला मोरङ सभापतिको हैसियतले गिरिजाप्रसाद कोइरालाले गरेका थिए। सोही अनुसार भृकुटीमण्डपको विशेष महाधिवेशन उद्घाटन काठमाडौंका सभापतिले गर्ने तय भएको हो।
विशेष महाधिवेशनको उद्घाटन महामन्त्रीद्वय गगन थापा र विश्वप्रकाश शर्माले गर्न सक्नेछन्। आयोजकले सभापति शेरबहादुर देउवालाई पनि निम्ता दिएको छ। तर उनी महाधिवेशनमा जान्छन् कि जाँदैनन् भन्ने टुंगो लागेको छैन।
उनी अनुपस्थित रहे महामन्त्रीद्वयले नै उद्घाटन गर्नेछन्।
बन्द सत्रको अध्यक्षता ज्येष्ठ सदस्यले गर्ने भनिएको छ।
विशेष महाधिवेशनमा प्रतिनिधिहरूलाई नाम दर्ताका लागि बिहान ८ बजेदेखि नै भृकुटीमण्डपमा उपस्थित हुन भनिएको छ।
देशभरिबाट ६० प्रतिशत महाधिवेशन प्रतिनिधि काठमाडौं आएको आयोजक समितिले दाबी गरेको छ।
उनीहरूलाई बागबजार, ठमेल लगायतका ठाउँहरुका होटलमा बस्ने व्यवस्था गरिएको छ।
महाधिवेशन प्रतिनिधहरूलाई आइतबार बेलुकाको खाना महाधिवेशन स्थलमै गरिएको छ भने सोमबार बिहानको नास्ता, दिउँसो र बेलुकाको खानाको व्यवस्था गरिएको आवास तथा खाना व्यवस्थापन उपसमितिका संयोजक रमेश धमलाले बताएका छन्।
उनका अनुसार बेलुकाको खानामा कुखुराको मासु र दिउँसोको खानामा खसीको मासु समावेश गरिएको छ।
-1768042217.jpg)
-1746009348.jpg)
