इरानमा जारी प्रदर्शनमा सरकार पक्षबाट दमन भएको भन्दै अमेरिकी राष्ट्रपति डोनाल्ड ट्रम्पले त्यहाँ सैन्य आक्रमण गर्ने विषयमा ब्रिफिङ लिएको खुलेको छ।
इरानलाई लगातार चेतावनीका बाबजुद त्यहाँको प्रदर्शन नियन्त्रणमा नआएको र सरकार पक्षले प्रदर्शनकारीमाथि गोली चलाएको खबरहरू सार्वजनिक भइरहँदा ट्रम्पले ह्वाइट हाउस र पेन्टागनका अधिकारीहरूसँग ब्रिफिङ लिएका हुन्।
अमेरिकी अखबार द न्यूयोर्क टाइम्सका अनुसार ट्रम्पले इरानमा सम्भावित सैन्य आक्रमणबारे पेन्टागनका वरिष्ठ सैन्य अधिकारी, ह्वाइट हाउसका राष्ट्रिय सुरक्षा सल्लाहकार र राष्ट्रिय सुरक्षा परिषदका अधिकारीहरूसँग गोप्य छलफल गरेका हुन्।
त्यस क्रममा सम्भावित सैन्य आक्रमणको नयाँ विकल्पबारे ट्रम्पले उनीहरूबाट ब्रिफिङ लिएको बताइएको छ।
यद्यपि ट्रम्पले इरानमा सैन्य आक्रमण गर्ने निर्णय भने गरिसकेका छैनन्। तर इरानी सरकारको दमनकारी कदमविरूद्ध सैन्य कारबाही गर्ने बारे गम्भीरताका साथ विचार गरिरहेको भनेर न्युयोर्क टाइम्सले लेखेको छ।
ब्रिफिङको क्रममा तेहरानाका गैरसैनिक ठेगानाहरूलाई निशाना बनाउनेसम्मका विकल्प प्रस्तु गरिएका थिए। साथै हिंसासँग प्रत्यक्ष रूपमा जोडिएका सुरक्षा निकायसम्बद्ध लक्ष्यहरू पनि विकल्पमा रहेको भनिएको छ।
यसबारे न्युयोर्क टाइम्सको चासोमा ह्वाइट हाउसले भने ट्रम्पले पछिल्लो समय इरानबारे सामाजिक सञ्जालमार्फत दिएका अभिव्यक्तिहरूलाई नै उद्धृत गरेर जबाफ दिएको छ।
ट्रम्पले इरानका प्रदर्शनकारीहरूको रक्षाका लागि अमेरिका तयार रहेको र इरानले प्रदर्शनकारीमाथि गोली चलाउन बन्द नगरे उनीहरूविरूद्ध अमेरिकाले गोली चलाउने चेतावनी दिएका थिए।
प्रदर्शन सुरू भएको आज दुई साता पुगेको छ। इरानी मुद्राको तीव्र अवमूल्यन, बढ्दो महँगी र सरकारको खराब आर्थिक नीतिहरूको विरूद्धमा सुरू भएको प्रदर्शन देशव्यापी बनेको छ।
प्रदर्शन चर्किएपछि सरकारले बल प्रयोग गरेर त्यसलाई दबाउन खोजे पनि सफल भएको छैन भनेर विभिन्न अन्तर्राष्ट्रिय सञ्चारमाध्यमहरूले जनाएका छन्।
दुई साताको अवधिमा दर्जनौं प्रदर्शनकारीहरू मारिएका छन्। देशभर इन्टरनेट बन्द गरिएको छ।
अमेरिकाको चेतावनीका बाबजुद सर्वोच्च नेता आयतोल्लाह अली खामेनीले सरकार पछि नहट्ने बताएका छन्।
यसबीच अमेरिकी विदेशमन्त्री मार्को रूबिओले पनि इसराइलका प्रधानमन्त्री बेन्जामिन नेतन्याहुसँग टेलिफोन वार्ता गरेका छन्।
उनले नेतन्याहूसँग इरानको अवस्थाबारे छलफल भएको न्युयोर्क टाइम्सले लेखेको छ। रूबिओले पनि सामाजिक सञ्जालमा इरानको साहसी जनताप्रति समर्थन छ भनेर लेखेका थिए।
भेनेजुएलामा भएको सैन्य कारबाहीपछि ट्रम्पले आफूले बोलेको कुरा गरेर पनि देखाउँछन् भन्ने पुष्टि भएको पनि विदेश मन्त्रालयले जनाएको छ।
तर इरानको मामिलामा भने अमेरिकाले सोचेजस्तो नतिजा नआउन सक्छ भन्ने चिन्ता पनि रहेको छ।
त्यहाँ हमला गरे उल्टै जनमत सरकारको पक्षमा जाने वा क्षेत्रीय स्तरमा प्रतिशोधात्मक हमलाको जोखिम बढ्नेप्रति ट्रम्प सचेत छन्।
कारबाही अघि क्षेत्रीय सुरक्षा तयारी सुदृढ गर्न थप समय आवश्यक पर्ने पनि एक वरिष्ठ सैन्य अधिकारीले न्यूयोर्क टाइम्सलाई बताएका छन्।
भेनेजुएलामै सैन्य कारबाही गर्न पनि अमेरिकी सेनाले महिनौं तयारी गरेका थिए। त्यस्तै इरानमा केही महिनाअघि भएको कारबाहीका लागि पनि लामो तयारी गरिएको थियो।
-1746009348.jpg)
