नेपाली कांग्रेसका केन्द्रीय सदस्य प्रदीप पौडेलले विशेष महाधिवेशन माग गर्नेहरूलाई पार्टी फुटाउन लाग्यो भनेर भन्न नपाइने टिप्पणी गरेका छन्।
विशेष महाधिवेशनको उद्घाटन समारोहमा पौडेलले सभापति शेरबहादुर देउवालाई लक्ष्य गर्दै बहुदलीय व्यवस्थामा गणितको ख्याल गर्न आग्रह गरे।
'कांग्रेस महाधिवेशन प्रतिनिधिहरूले, जसले कांग्रेसको निम्ति जीवन समर्पण गर्नुभयो, कसैले राज्यको पद पाउनुभएन। उहाँहरूलाई कांग्रेस फुटाउनु छैन, बलियो बनाउनुछ, एकता कायम गर्नुछ,' पौडेलले भने, 'विशेष महाधिवेशन माग गर्दा उहाँहरूलाई अपमान गरेर कांग्रेस फुटाउन लाग्यो भन्न पाइँदैन।'
उनले अगाडि भने, 'यो बहुदलीय व्यवस्थामा गणित प्रधान विषय हुन्छ। गणितका आधारमा विश्वास प्राप्त भएन भने नैतिकता ख्याल गर्नुपर्छ। म लोकतान्त्रिक पद्धतिका निम्ति संघर्ष गरेको नेतृत्वलाई त्यो आग्रह गर्न चाहन्छु।'
पौडेलले नेपालको लोकतन्त्र जोगाउन, अतिवाद समाप्त पार्न र भूराजनीतिक सन्तुलन कायम गर्न कांग्रेस बलियो बन्नुपर्ने बताए।
'नागरिकको अपेक्षा बमोजिमको कांग्रेस निर्माण प्रक्रियामा हामी धेरै ठाउँमा चुकेका छौं भन्ने स्वीकार गर्नुपर्छ,' पौडेलले भने, 'त्यसैले हामीले नेतृत्व रक्षाको निम्ति कांग्रेसको भविष्य समाप्त गर्ने कि कांग्रेसको भविष्यका निम्ति नेपाली कांग्रेसको नेतृत्व फेर्ने हाम्रो हातमा छ।'
उनले भदौ २३ र २४ गते भएको जेजनी आन्दोलनले नेपालको राजनीतिक दल र कांग्रेसलाई परिवर्तनको सन्देश दिएको बताए।
'नेपालको इतिहासमा कांग्रेसले नेतृत्व गरेको बाहेक अरू आन्दोलन भएको थिएन। तर भदौ २३ र २४ गते आन्दोलन भयो,' उनले भने, 'त्यसले कांग्रेसलाई लोकतन्त्र बलियो बनाउने सन्दर्भमा तिमी सशक्त भएर आऊ, प्रश्नरहित भएर आऊ, प्रश्न उठ्ने स्थिति नबनाएर आऊ भनेको छ।'
उनले विशेष महाधिवेशनबाट कांग्रेस सच्चिएर आएको सन्देश जनतामा दिनुपर्ने बताए।
'कांग्रेसले आफूलाई प्रस्ट्याएका कारण मत दिनुपर्छ भन्ने स्थिति हामीले बनाउनुपर्छ,' पौडेलले भने।
-1746009348.jpg)
