जनता समाजवादी पार्टी, नेपाल र लोकतान्त्रिक समाजवादी पार्टी नेपाल बीच एकीकरणसम्बन्धी आइतबार १२ बुँदे सहमति भएको छ। गत पुस १३ गते जनता समाजवादी पार्टी, नेपाल र लोकतान्त्रिक समाजवादी पार्टी नेपालबीच सहमति भई एकीकरण गर्ने संयुक्त प्रेस विज्ञप्ति जारी भएको थियो, उक्त विज्ञप्तिलाई आधार मानी एकीकरण प्रक्रिया अगाडी बढाउने सहमति भएको दुवै पार्टीले जानकारी दिएका छन्।
सहमतिको दोस्रो बुँदामा जसपा र लोसपा नेपालबीच एकीकरण गरी जनता समाजवादी पार्टी, नेपाल कायम राख्ने सहमति गरिएको छ। पार्टीको चुनाव चिह्न छाता रहने भएको छ।
पार्टीको झण्डामा माथि रातो बीचमा सेतो र तल्लो भागमा हरियो गरी तीन रङ्गको झण्डा र बीच भागमा ढल्केको छाता रहने उल्लेख छ।
पाँचौं बुँदामा जनता समाजवादी पार्टी, नेपाल एकीकृत रूपमा सञ्चालन गर्न एक केन्द्रीय समन्वय समिति रहने र केन्द्रीय समन्वय समिति ४३ सदस्यीय रहने निर्णय भएको छ। केन्द्रीय समन्वय समितिले आफू मध्येबाट ११ सदस्यीय सचिवालय गठन गर्ने सहमतिमा उल्लेख छ।
छैठौं बुँदामा दुबै पार्टीमा रहेको केन्द्रीय समिति समायोजन नहुन्जेलसम्मका लागि केन्द्रीय समन्वय समिति पार्टीको संगठन संचालन, परिचालन, निर्देशन तथा निर्णायक समिति हुने उल्लेख छ।
जनता समाजवादी पार्टी, नेपाल र लोकतान्त्रिक समाजवादी पार्टी नेपाल मातहतका सबै तह र निकायका संगठनहरू, भ्रातृ संगठनहरू, शुभेच्छुक संगठनहरू, विभागहरू, संयन्त्रहरू समेत जनता समाजवादी पार्टी, नेपालको मातहतमा रही केन्द्रीय समन्वय समितिको निर्णयानुसार कार्य गर्ने सहमतिमा जनाइएको छ।
आठौं बुँदामा पार्टी संगठन र पार्टीप्रति आबद्ध संगठनहरूबीच समायोजन नहुन्जेलसम्म आ–आफ्नो स्थान र कार्यक्षेत्रमा पार्टीको मातहत रही क्रियाशील रहने बताइएको छ।
२०८२ साल फागुन २१ गते हुने प्रतिनिधि सभाको उम्मेदवारको लागि पेश गरिने मनोनयन पत्रमा समन्वय समितिबाट हुने निर्णयानुसार हस्ताक्षर महन्थ ठाकुर र उपेन्द्र यादवले संयुक्त रूपमा गर्ने सहमतिमा उल्लेख छ। दुबै पार्टीको एकीकरण सम्बन्धी थप प्रक्रिया राजनीतिक दल सम्बन्धी ऐन, २०७३ र प्रचलित कानुन अनुसार अगाडि बढाइने सहमति पत्रमा उल्लेख छ।
केन्द्रीय समन्वय समितिका निर्णयहरू पार्टीका संरक्षक एवं अध्यक्षले प्रमाणिकरण गर्ने आजको सहमति पत्रमा उल्लेख छ।
सहमति
-1746009348.jpg)
