नेपाली कांग्रेसका महामन्त्री विश्वप्रकाश शर्माले विशेष महाधिवेशनमा प्रत्येक नागरिकको असन्तुष्टिको केस्राकेस्रा केलाउने बताएका छन्/
आइतबार नेपाली कांग्रेसको विशेष महाधिवेशनमा बोल्दै उनले सबै नेपाली नागरिकको असन्तुष्टिलाई केलाएर छलफल गर्ने बताएका हुन्।
'आदरणीय आमाबुबा, दिदीबहिनी, दाजुभाइहरू, कसैले लाइभ हेर्दै हुनुहुन्छ, कसैले युट्युबमा हेर्दै हुनुहुन्छ भने तपाईंका प्रत्येकको असन्तुष्टि केस्राकेस्रा, बुँदाबुँदा हामी कांग्रेसको महाधिवेशनमा छलफल गर्नेछौं। पहिचान गर्नेछौं,' उनले भने, 'कांग्रेस फागुन २१ गते रूख चिन्हमा मतदान गर्नुअघि आदरणीय आमाबुबा, दिदीबहिनी, दाजुभाइहरू, तपाईंहरूको असन्तुष्टि, गुनासो टिपोट गरेर, पहिचान गरेर, नदोहोर्याएर, संकल्प गर्न पनि विशेष महाधिवेशन गरेर जाँदैछौं।'
उनले पछिल्लो ३४ वर्षमा ३० वटा सरकार परिवर्तन भए पनि जनता सन्तुष्ट नभएको पनि बताए।
'३४ वर्षमा ३० वटा सरकार बनाउँदा सन्तुष्टि प्रधानमन्त्री बन्नेहरूलाई मिल्यो होला। नागरिकलाई मिलेन। प्रशासनिक कार्यालयमा सेवा लिन गएका कुनै सेवाग्राही यो कोठाबाट त्यो कोठा, त्यो कोठाबाट यो कोठा। त्यसपछि भोलिभोलि भन्दा सिडिओ साबलाई सञ्चो मिल्यो होला, सेवाग्राहीलाई लागेन। गृहमन्त्रीलाई लाग्यो होला सेवाग्राहीलाई लागेन। खेतीको बेलामा मल कुरिरहेको कुनै किसान कृषिमन्त्रीको अनुहार सम्झेर खेतमा खेती हुँदैन भनेर मान्न तयार हुँदैन। यस्ता कयौं असन्तुष्टि छन् जुन हामी बन्दसत्रको प्रतिवेदनमा डिटेलमा पेस गर्छौं,' उनले भने।
त्यस्तै उनले जेनजी आन्दोलनमा देखिएका अनुहारहरू अन्तरिक्षबाट नआएको बताए।
'जेनजीप्रति नकरात्मक बन्न जरूरी छैन। जेनजी अन्तरिक्षबाट आएका थिएनन्। जेजनी हाम्रै काखमा हुर्किएका भाइबहिनी थिए। हाम्रै आँगनमा हुर्किएका काखमा हुर्के बढेका छोराछोरी थिए। भदौ २३ मा इतिहासमै ठूलो भूल भएकै हो। त्यो रात र कयौँ रात हामी निदाउन सकेनौं,' उनले भने।
उनले अगाडि भने, 'आज पनि आफैलाई प्रश्न गर्ने गर्छु। भदौ २३ गते संसद भवन तोडिन दिएको भए के फरक पर्थ्यो होला? संसद भवन जोगाउने नाममा त्यतिको जीवनहरू समाप्त नभएको भए, सम्भवतः भिड व्यवस्थापन गर्ने क्षमता सही ढंगले प्रस्तुत गरेको भए, भोलिपल्टको घटना नहुन सक्थ्यो।'
उनले भदौ २३ गते सरकारबाट बल अत्यधिक प्रयोग भएको विषय प्रतिवेदनमा लेखेर जाने पनि बताए।
'२३ गतेको घटनाको गम्भीर अनुसन्धान गरेर त्यो बल प्रयोग अत्यधिक भएको हो र त्यसबाट भएको असर र जीवनको सन्दर्भको छानबिन गरेर जानेकुरामा कांग्रेसको विशेष महाधिवेशन डकुमेन्टका साथ प्रस्ट हुन्छ। हामीले यो पनि स्मरण गर्नुपर्छ। जल्दै गरेको सिंहदरबार कुनै प्रधानमन्त्री विशेषको थिएन। सिंहदरबार पाकाको पनि, जेनजीको पनि थियो। जेनजीहरू त्यहाँसम्म भएको जिम्मेवारी लिनुपर्छ, जहाँसम्म सहभागिता थियो। घुसपैठका साथ भएर तोडिएका, जलाइएका समग्र ठाउँको जिम्मा लिने हो भने त्यही रूपको मनोविज्ञान हो भने, त्यही रूपमा र फरक हो भने, सहभागिता नभएको ठाउँको दोष लिनुहुन्न,' उनले भने।
-1746009348.jpg)
