नेपाली कांग्रेसका महामन्त्री गगन थापाले पार्टी सदस्यले मागेका कारण विशेष महाधिवेशन भएकाले कहाँ पुगेर टुङ्गिन्छ भन्ने आफूलाई थाहा नभएको बताएका छन्।
विशेष महाधिवेशनको उद्घाटन समारोहमा महामन्त्री थापाले आफू समेत महाधिवेशन प्रतिनिधिले बोलाएको पाहुना भएको टिप्पणी गरे।
‘सदस्यले मागेको विशेष महाधिवेशन भएको हो। नीति पनि बदल्ने। नेता पनि बदल्ने भनेर माग्नुभएको छ। यो कहाँ गएर टुङ्गिन्छ मलाइ थाहा छैन’, थापाले भने, ‘म पनि बोलाएर आएको पाहुना हुँ। भोलि अधिवेशनको हाउस बस्छ। त्यसले निर्णय गर्छ। मेरो लागि त्यो स्वीकार्य छ। अर्को महामन्त्रीले भनिसक्नुभएको छ। सबैले मान्नुपर्छ। जहाँ लगेर टुङ्ग्याउनु हुन्छ। यसलाई मैले सम्मान गर्छु।’
उनले कांग्रेस ज्यूँदो मानिसहरुको पार्टी भएको बताए।
‘विशेष महाधिवेशनले एउटा कुरा स्थापित गरेको छ। कांग्रेस दास र लासहरुको पार्टी होइन। कांग्रेस ज्युँदो मानिसहरुको पार्टी हो। यहाँ प्रश्न मरेको छैन’, थापाले भने, ‘यहाँ कुनै बा छैन, जसले नबोल भन्दा बोल्न छाड्ने कोही पनि छैन। सबै बराबर छौँ। यहाँ प्रश्नहरु छन्। जुन पार्टी भित्र प्रश्न मर्छ। त्यसले समाजमा प्रश्न गर्न सक्दैन। प्रश्न गर्न नसक्नेले उत्तर खोज्न सक्दैन। समाधान दिन सक्दैन।’
उनले कांग्रेसको विशेष महाधिवेशनको उद्घाटन सभापति शेरबहादुर देउवाले गरेको हेर्न चाहेको बताए।
‘कतिपयलाई कांग्रेस भित्र झगडा भइरहेको छ भन्ने लाग्न सक्छ’, थापाले भने, ‘भाद्र २३ र २४ गते जनेजीले मात्र होइन। लाखौं नरनारीले सडकमा आएर घरमा बसेर रिस पोखेका हुन्। आक्रोश व्यक्त गरेका हुन्। सरकारसँग, अनि त्यो सरकारमा को थियो। हामी थियौं। संसदसँग, अनि संसदमा को थियो। हामी थियौं। राजाको छोरा राजा हुने व्यवस्था फालेर बनेको व्यवस्थामा नेपोबेबीको राज देखेर रिसाएको हो। चित्त दुखाएको हो नि। असन्तुष्ट भएकै हो नि। हाम्रो अगाडिको प्रश्न नदेखा गर्ने र वेवसाता गर्ने र त्यसलाई बुझ्ने वा मनन गर्ने वा सम्बोधन गर्ने भन्ने हो। यो विशेष महाधिवेशन त्यसको प्रयास हो।’
उनले पार्टी कार्यकर्ताले भदौ २३ र २४ गतेको घटनाबारे महाधिवेशनको मञ्चमा छलफल चाहेको बताए।
‘हामीले आफूले आफूलाई सोध्नुपर्छ गल्ती कहाँ भयो। ती मानिस को हुन्? ती सेनाका ट्याङ्क राख्दा हामीसँगै गोली थाप्न आएका मानिस हुन्। तिनकै छोराछोरी हुन्। आज हामीसँग किन रिसाएका छ? हामीले यति कुरा भनेको हो। हामी एक ठाउँमा आएनुपर्छ। त्यसका निम्ति अधिवेशन भन्दा अर्को मञ्च सानो मञ्च हुन्छ’ थापाले भने, ‘हाम्रो कुरा यहिँ मिलेन। आज कोही यहाँ आएका छौँ। कोही आएका छैनौँ। यो शक्ति र सत्ताको संघर्ष होइन। देशलाई कसरी बुझ्ने नागरिकलाई कसरी बुझ्ने, जनभावनालाई कदर गर्ने कि नगर्ने भन्ने सोचको भानाका कारण हामी यहाँ कोही भयौँ। कोही हुन सकेनौँ।’
उनले पार्टी ठिक ढंगले नचलेको सदस्यहरुको धारणा रहेको र उनीहरुले प्रश्न उठाएको बताए।
‘चुनाव एउटासँग मिलेर लड्ने सरकार अर्कोसँग मिलेर बनाउने। सरकार बनाउन जे पनि गर्ने । सरकारबाट बाहिर बस्नुपर्यो भने सबैकुरा सकिएको जस्तो गर्ने, चालढाल ठिक छैन’, थापाले भने, ‘तिमी बदलिनुपर्छ पार्टीको सदस्यले यहि भनेको हो। तिमीलाई सांसद बनाएँ, मन्त्री बनाएँ। तिमीहरु बस, छलफल गर, भनेको थिए। पार्टीको सदस्यले भनेको यहि कुरा बोकेर महाधिवेशन प्रतिनिधिहरुले आउनुभयो। उहाँले महाधिवेशन गर्नुस्। भ्याउनुभएन भने विशेष महाधिवेशन गर्नुस् भन्नुभयो।’
उनले विशेष महाधिवेशनमा उपस्थिति प्रतिनिधिहरुले नै भोट हालेर सभापति शेरबहादुर देउवालाई छानेको बताए।
‘लामो समयदेखि पार्टी भित्र पार्टी सञ्चालनको तरिका आजबाट भत्कियो। भोली जो सुकै आओस् पार्टी सदस्यलाई हेप्न सक्दैन। तल बस्ने सदस्यले निहुरिएर सलाम गर्नुपर्छ। तलबाट माथि होइन। यो पटक माथिले गरेको होइन। तलले गरेको हो। तल बस्ने साथीहरुलाई पनि गाउँका साथीहरुले पठाउनुभएको हो। पार्टी कसरी चलाउने भन्ने विषयसँग जोडिएको छ।’
-1746009348.jpg)
