'पपुलिजम' को चुनौती सामना गर्ने गगनको प्रस्ताव

सेतोपाटी संवाददाता

काठमाडौं, पुस २८

नेपाली कांग्रेसको विशेष महाधिवेशनमा महामन्त्री गगन थापाले पपुलिजम (प्रियतावाद) को चुनौती सामना गर्दै गरेर उदार लोकतन्त्रको रक्षा गर्ने प्रस्ताव गरेका छन्।

विश्वव्यापी रूपमा देखिएको पपुलिजम र अराजकतावाद नेपालमा पनि देखिएको उनको प्रस्तावमा उल्लेख छ।

‘विश्वव्यापी रूपमा देखिएको पपुलिजम र अराजकतावादको लहरपछि नेपालमा पनि प्रवृत्ति र पात्रहरूले लोकतान्त्रिक प्रणाली, उदारवाद, बहुलवादी सिद्धान्त तथा मूल्य र मान्यताको अवमूल्यन गर्ने प्रवृत्ति बढ्दै गएको उनको देखिन्छ,’ उनले भने, ‘यस्ता पात्र र प्रवृत्तिहरूले गर्दा लोकतान्त्रिक प्रणाली र संस्थालाई बलियो बनाएर होइन, चमत्कारबाट हुन्छ भन्ने भ्रम सिर्जना भइरहेको छ।’

‘यस्तो प्रवृत्तिलाई रोकी उदार तथा समावेशी लोकतन्त्र र बहुलवादी समाजको संवर्द्धन र प्रवर्द्धन गर्नु नेपाली कांग्रेसको ऐतिहासिक दायित्व हो। लोकतन्त्र भनेको चमत्कार होइन, यो प्रणाली, पद्धति र प्रक्रिया हो,’ उनले भने, ‘लोकतान्त्रिक प्रणालीमा लोकतान्त्रिक संस्था सक्षम र सबल हुनुपर्छ र सरकार र राजनीतिक पार्टीहरू जनताप्रति उत्तरदायी हुनुपर्छ।’

लोकतन्त्रको अर्थ शासन प्रणाली मात्रै होइन जीवन पद्धति भएको उनले उल्लेख गरेका छन्।

‘लोकतान्त्रिक संस्थाहरू कार्यमूलक र प्रभावकारी भए पद्धतिको विकास हुन्छ र पद्धतिको विकास भए मात्रै प्रणालीको विकास हुन्छ। त्यसैले लोकतन्त्रको अर्थ केवल शासन प्रणाली मात्रै होइन, जीवन पद्धति हो। लोकतन्त्र प्रणाली प्रधान तथा संस्था प्रधान हुन्छ। लोकतन्त्र विधिसम्मत र प्रक्रियामुखी हुन्छ,’ उनले भने।