नेपाली कांग्रेसका महामन्त्री गगन थापाले संविधान संशोधनको पहल गर्ने प्रतिबद्धता व्यक्त गरेका छन्।
भृकुटीमण्डपमा जारी बन्द सत्रमा उनले समसामयिक राजनीतिक प्रस्ताव प्रस्तुत गर्दै संविधान संशोधनका लागि पहल गर्ने प्रतिबद्धता व्यक्त गरेका हुन्।
'संविधान कार्यान्वयनको समग्र अवस्था, प्राप्त उपलब्धि र कमी-कमजोरी तथा बाँकी कामहरुका सम्बन्धमा बस्तुनिष्ठ समीक्षा आवश्यक भएको छ। लोकतान्त्रिक प्रणाली र नेपालका संविधानका आधारभूत सिद्धान्तलाई निरन्तरता दिदै संविधान संशोधन गरी आफ्ना माग सम्बोधन गर्न उठाउँदै आएका आवाज र मागलाई हामी सम्मान गर्दछौं,' उनले भनेका छन्।
संविधान गतिशील र परिवर्तनशील दस्तावेज भएकाले नागरिकको भावनाअनुसार समयानुकूल संशोधन, परिमार्जन र अद्यावधिक हुँदै जानु स्वाभाविक लोकतान्त्रिक प्रक्रिया रहेको पनि महामन्त्री थापाले बताएका छन्।
'नेपाली कांग्रेसले प्रमुख राजनीतिक पार्टीका साथै सबै सरोकारवालाहरूसँग सघन संवाद र परामर्श गरी संविधान संशोधन गर्न पहल गर्ने छ र सम्पूर्ण नेपाली नागरिकले अपनत्व र स्वामित्व ग्रहण गर्ने साझा र समृद्ध दस्तावेजको रूपमा विकास गर्न तथा लोकतान्त्रिक प्रक्रियामार्फत सहमतिका आधारमा ती माग सम्बोधन गर्ने प्रतिबद्धता व्यक्त गर्दछ,' थापाले आफ्नो प्रतिवेदनमा उल्लेख गरेका छन्।
-copy-1768204357.jpg)
-1746009348.jpg)
