नेपाली कांग्रेसलाई फुटबाट जोगाउन पार्टी सभापति शेरबहादुर देउवाले महामन्त्रीद्वयलाई बोलाएर छलफल गर्न उनी निकट केन्द्रीय सदस्यहरूले सुझाएका छन्।
कांग्रेस प्रचार विभाग प्रमुख मीनबहादुर विश्वकर्माले सोमबार आफूहरू देउवा निवासमै गएर महामन्त्रीद्वय गगन थापा र विश्वप्रकाश शर्मासँग कुरा गर्न सुझाएको बताए।
'हामीले पार्टीलाई फुटबाट जोगाउन महामन्त्रीहरूलाई बोलाएर उहाँहरूका कुरा के छन् सोध्नुपर्यो, बुझ्नुपर्यो भन्यौं,' विश्वकर्माले सेतोपाटीसँग भने, 'पार्टीमा सबै किसिमका संवाद हुनुपर्यो र पार्टीलाई एकढिक्का राख्नुपर्यो भनेका छौं। त्यसका लागि लचकता अपनाउनुपर्यो भनेका छौं।'
उनका अनुसार देउवाले महामन्त्रीहरू आफूसँग रिसाएको र बोलाउँदा पनि नआउने हुन् कि भनेर शंका व्यक्त गरेका थिए।
'त्यस्तो हुँदैन तपाईंले कुरा गरेपछि उनीहरू संवादमा आउँछन् भनेर भन्यौं,' उनले भने।
त्यसपछि केन्द्रीय सदस्यहरूले के के कुरामा लचक हुन सकिन्छ भन्नेबारे छलफल गरेका थिए। विश्वकर्माका अनुसार उनीहरूले तीन कुरामा लचकता अपनाउन सकिने भनेर देउवालाई सम्झाएका थिए।
पहिलो त विशेष महाधिवेशनलाई पहिले असान्दर्भिक भनेकोमा त्यसलाई बिर्सेर अब विशेष नीति महाधिवेशन मान्न सकिने उनको भनाइ छ।
दोस्रो, वैशाखमा हुने भनिएको १५औं महाधिवेशनभन्दा अगाडि आवश्यक पर्ने सबै समिति बनाउँदै जाने कुरा भएको छ।
तेस्रो, कार्यवाहक दिइसकेपछि उम्मेदवार मनोनयनपत्रमा पार्टी सभापतिको होइन, कार्यवाहक सभापति पूर्णबहादुर खड्काले नै हस्ताक्षर गर्ने कुरा भएको छ।
'यी लगायतका कुरा भएपछि महामन्त्रीहरूले पनि विशेष महाधिवेशनमा निर्वाचनको कुरा छाडेर नीति महाधिवेशनमा फोकस गर्नुपर्यो भन्ने हो,' विश्वकर्माले भने, 'हामीले संस्थापन पक्षको लचकता यो हो भनेर सम्झाएपछि सभापति र कार्यवाहक सभापतिले त्यसलाई सकारात्मक रूपमा लिनुभएको छ। सुन्नुभएको छ। निर्णयमा पुग्न धेरै समय नलगाउनुस भनेका छौं।'
-1746009348.jpg)
