जापानकी प्रधानमन्त्री सनई ताकाइचीले संसद विघटन गरेकी छन्।
प्रधानमन्त्री ताकाइचीले शुक्रबार संसदको तल्लो सदन (प्रतिनिधि सभा) विघटन गर्दै आकस्मिक निर्वाचन घोषणा गरेकी हुन्।
जापान टाइम्सका अनुसार प्रधानमन्त्री ताकाइचीले फेब्रुअरी ८ मा चुनाव घोषणा गरेकी छन्।
जापानको इतिहासमा अहिलेसम्मकै छोटो समयमा चुनाव हुन लागेको अमेरिकी पत्रिका ब्लुमबर्गले जनाएको छ।
ताकाइची गत अक्टोबर अन्तिममा प्रधानमन्त्री बनेकी थिइन्।
त्यतिबेला तल्लो सदनमा ४६५ मध्ये २३५ सांसदको समर्थनसहित ताकाइची प्रधानमन्त्री बनेकी थिइन्। बहुमतका लागि २३३ मत आवश्यक रहन्छ।
अहिले झिनो बहुमत मात्रै भएकाले काम गर्न सहज हुनेगरी बहुमत ल्याउन ताकाइचीले आकस्मिक निर्वाचन घोषणा गरेको भनेर ब्लुमबर्गले लेखेको छ।
उनको यो कदमलाई वर्तमान शक्ति सन्तुलनलाई मजबुत बनाउँदै आफ्नो नेतृत्वलाई सुदृढ गर्ने रणनीतिका रूपमा लिइएको छ।
छोटो समय भएकाले निर्वाचन कार्यक्रम पनि मंगलबारदेखि नै सुरू हुनेछ।
चिसो मौसमको चरम समयमा निर्वाचन हुने भएकाले हिमपात हुने क्षेत्रहरूमा मतदाता सहभागिता कम हुन सक्नेछन्।
पछिल्लो समय महँगीविरूद्ध र आप्रवासीको सवालमा उनको नीतिलाई लिएर जापानमा ताकाइचीको लोकप्रियता बढेको छ।
त्यसकारण पनि उनले चुनाव गर्न लागेको बताइएको छ।
-1746009348.jpg)
