राष्ट्रिय स्वतन्त्र पार्टी (रास्वपा) का काठमाडौं क्षेत्र नम्बर ५ का उम्मेदवार आकांक्षी प्रणय राणाले प्राइमरी चुनावको नाममा पार्टीले उठाएको २५ हजार रुपैयाँ फिर्ता गर्नुपर्ने बताएका छन्।
रास्वपाले उम्मेदवारका आकांक्षीहरूसँग २५ हजारका दरले रकम उठाएको थियो। त्यस्तै समानुपातिकतर्फ उम्मेदवारका आकांक्षीसँग ५० हजार रकम शुल्क तोकेको थियो।
रास्वपाले विधानमा पार्टी सदस्यहरूबाट मतदान गराएर उम्मेदवार छान्ने विधि (प्राइमरी निर्वाचन) को व्यवस्था छ। तर प्रत्यक्षतर्फको उम्मेदवार चयन गर्दा रास्वपाले प्राइमरी चुनाव गरेको थिएन। समानुपातिक तर्फको निर्वाचन प्रणालीमा पनि मतदानमा धेरै मत ल्याइएकाहरुलाई पछाडी पारिएको थियो।
भिडिओ:
राणाले सामाजिक सञ्जाल फेसबुकमा एउटा भिडिओ पोस्ट गर्दै ’२५ हजार फिर्ता नगरे, त्यो ठगी हुने’ उल्लेख गरेका छन्।
रास्वपा उपसभापति स्वर्णिम वाग्लेले सेतोपाटीसँगको कुराकानीमा प्रत्यक्षतर्फको मनोनयनमा ७५० जना आकांक्षी रहेको उल्लेख गरेका थिए।
राणाले दाबी गरेजस्तै ७ सय ५० आकांक्षीले नै २५ हजार शुल्क लिएको भए त्यो १ करोड ८७ लाख ५० हजार हुन आउँछ।
राणाले भिडिओमा आफू नेपाली कांग्रेसबाट राष्ट्रिय स्वतन्त्र पार्टी प्रवेश गरेको र पार्टीको राष्ट्रिय भेलामासमेत प्राइमरी निर्वाचनमा मतदानलाई नै अन्तिम मान्नुपर्ने धारणा राखेको सार्वजनिक गरेका छन्।
‘म लगायत सबै उम्मेदवारका आकांक्षीहरूले प्राइमरी चुनावमा भाग लिनका लागि २५ हजार दिएका थियौँ’, राणाले भनेका छन्, ‘केही समयमै अब यो विधि छैन भनियो, भनेपछि हामीले पैसा के का लागि तिर्यौं।’
उनले फेसबुकमा राखेको भिडिओमा आफूले राष्ट्रिय भेलामामा राखेको धारणा पनि राखेका छन्। जसमा उनले प्राइमरी निर्वाचनमा मत हालेपछि मत नै निर्णायक हुनुपर्ने धारणा राखेका छन्।
‘संसारभर भोटिङ हुन्छ भने त्यो फाइलन हुन्छ। शिक्षा, योग्यता, अनुभव र पार्टीमा गरेको योगदानकै आधारमा भोट माग्ने हो। मेरो योग्यता यति छ। मैले यो गरेको थिएँ भनेर मत माग्ने हो’, राणाले भनेका छन्, ‘राष्ट्रिय भेलामा ठूलो तालीले अनुमोदन गरेको थियो।’
उनले पार्टीले रूपन्देहीको उपनिर्वाचनका लागि गरेको प्राइमरी निर्वाचनको नतिजा कहिल्यै सार्वजनिक नगरेको पनि आरोप लगाएका छन्।
‘कसको भोट कति र हरेक विधामा कति भोट आयो, पारदर्शिता र जबाफदेहिता त्यहाँ छैन’, उनले भनेका छन्, ‘२०८२ को समानुपातिकको सूचीमा पनि पारदर्शिता छैन। अन्तिम सूचीमा धेरै तल माथि भयो। प्रत्यक्षतर्फ विधि नै लत्याइयो। त्यो सबै उम्मेदवारका आकांक्षीको २५ हजार फिर्ता दिनुपर्छ, नत्र त त्यो ठगी हुन्छ।’
उनले पार्टीको आन्तरिक लोकतन्त्रबारे सार्वजनिक बहस हुनुपर्ने धारणा पनि राखेका छन्।
‘यस्ता गम्भीर विषय उठाउने कि नउठाउने। निर्वाचनका समयमा सार्वजनिक बहस हुनुपर्छ कि पर्दैन’, राणाले प्रश्न गरेका छन्, ‘यदि पार्टीले आन्तरिक लोकतान्त्रिक अभ्यासमा नियत स्पष्ट देखाउँदैन र व्यक्तिवादी चरित्र देखाउँछ भने सरकारमा गइसकेपछि काम गर्ने तरिका कस्तो हुन्छ?’
उनले रास्वपाको नेतृत्वले प्राइमरी निर्वाचनको विषयलाई मिडियाबाजीको अस्त्र बनाएको आरोप पनि लगाएका छन्।
‘प्राइमरी रास्वपाको मिडियाबाजी गर्ने अस्त्र भयो। तर हामीले संगठनमा अनुभूती गर्न पाएनौँ। सच्याउन हरप्रयास गर्दा पनि सकेनौँ,’ उनले भने।
उनले अनलाइन भोटिङको विश्वसनियतामा पनि प्रश्न गरेका छन्।
रास्वपाले पार्टीमा उम्मेदवार बन्न आकांक्षीहरूबीच मोइबाल एपमा मतदान गराएको थियो। उनले त्यसको साटो व्यक्ति नै निर्वाचन क्षेत्रमा उपस्थित भएर मतदान गर्ने विधि अपनाउनुपर्ने बताएका छन्।
राणाले २५ हजार रकम बुझाएको बताए पनि राष्ट्रिय स्वतन्त्र पार्टीकी कोषाध्यक्ष लिमा अधिकारीले पैसा संकलनको विषय थाहा नभएको बताइन्।
‘यो हामीलाई थाहा भएन उहाँलाई नै सोध्नुस्’, अधिकारीले भनिन्, ‘पार्टीले कसैसँग पनि पैसा उठाएको छैन।’
सम्बन्धित समाचार
रवि लामिछानेको ३० लाख जमानत बसिदिने मनोहर प्रधान रास्वपाको समानुपातिक सूचीमा
रास्वपा विवाद– आन्तरिक मतदानमा अगाडि, समानुपातिक सूचीमा नाम पछाडि
किन प्राइमरी चुनाव नगरी टिकट बाँड्यो रास्वपाले?
फेरि यस्तो नहोस् अबको रास्वपाको घोषणापत्र
-1746009348.jpg)
