नेपाली कांग्रेसका सभापति गगन थापाले क्रियाशील सदस्यता अद्यावधिक नगर्नेहरूलाई पार्टीले सदस्यका रूपमा नचिन्ने बताएका छन्।
पार्टीले क्रियाशील सदस्यहरूको विवरण डिजिटल बनाएको बताउँदै उनले सिस्टमले नै अब अद्यावधिक नगर्नेलाई पार्टी सदस्यका रूपमा नचिन्ने बताएका हुन्।
‘तपाईंहरूमध्ये कसैले क्रियाशील अद्यावधिक गर्नुभएको छैन भने मलाई क्षमा गर्नुहोला- अद्यावधिक नभएको कोही पनि साथीलाई नेपाली कांग्रेसले सम्मान गर्छ, माया गर्छ तर पार्टी सदस्यका रूपमा चिन्दैन। अब मैले के गर्ने? मैले व्यक्तिगत रूपमा चिन्छु, जय नेपाल भन्छु तर अब सिस्टमले नै चिन्दैन, भोट हाल्ने बेला नाम वडामा आउँदैन,’ झापामा आज भएको कार्यक्रममा बोल्दै सभापति थापाले भने।
उनले अब छिट्टै वडा अधिवेशन सुरू हुने बताए।
‘अद्यावधिक नगरेका साथीहरूको नाम अब वडा अधिवेशनका क्रममा आउँदैन, सिस्टमले नै चिन्दैन,’ उनले भने, ‘हामी लचिलो भएका पनि हौं, गएका ८/१० वर्षमा पार्टीलाई छियाछिया बनाइएको थियो, पार्टीलाई सुधार्छु भनेर संकल्प लिएर आएको बेलामा यो संकल्पको यात्रालाई ठेस पुर्याउने गरी आएका प्रस्तावहरूलाई नमानेर अघि बढ्ने हो।’
उनका अनुसार पार्टीले अब सदस्यता व्यवस्थापन, निर्वाचन प्रक्रिया र संगठन सञ्चालनलाई पूर्ण रूपमा डिजिटल प्रणालीमा आधारित बनाउँदैछ। त्यसैले अद्यावधिक नभएका सदस्यको नाम वडा अधिवेशनदेखि माथिल्लो तहका निर्वाचन प्रक्रियामा समावेश नहुने उनको भनाएइ थियो। थापाले यो व्यवस्था कसैलाई निषेध गर्न नभई पार्टीलाई विधिसम्मत र व्यवस्थित बनाउन लागू गरिएको उल्लेख गरे।
निवर्तमान सभापति शेरबहादुर देउवा र नेता शेखर कोइराला पक्षका कतिपय नेताहरूले क्रियाशील अद्यावधिक गरेका थिएनन्। कांग्रेसले निवेदन दिएर असार २० भित्र अद्यावधिक गर्न सक्ने समय पनि दिएको छ।
सभापति थापाले पार्टीको प्रतिष्ठालाई केन्द्रमा राखेर पार्टीलाई मिलाएर लैजाने पनि बताए। तर भागबन्डा नहुने उनको भनाइ छ।
‘दसौं लाख मानिस कांग्रेसलाई मत हाल्दै आएका छन्, उनीहरूको भरोसा जित्नुपर्दैन? तिनले भरोसा गर्ने पार्टी बनाउने हो कांग्रेसलाई,’ उनले भने, ‘साथ दिनुस् न, एक वर्षभित्र भरोसायोग्य पार्टी बनाउँछौं। घरघरमा जानुपर्छ, हामीहामी बसेर हुँदैन।’
उनले संस्थापनइतर पक्षले नमिल्दो माग राखेको संकेत गरेका थिए। १४ औं महाधिवेशनबाट आएको र विशेष महाधिवेशनबाट आएको कार्यसमितिलाई मर्ज गर्ने कुरा विधानविपरीत हुने र त्यो काम आफूले गर्न नसक्ने सभापति थापाले बताए।
१५ औं महाधिवेशन निष्पक्ष र पारदर्शी बनाउन सबै पक्षलाई समेटेर जान आफूहरू तयार रहेको सभापति थापाको भनाइ छ।
‘१४ औं महाधिवेशनका सबैलाई ल्याएर यहाँ मिसाउनुपर्छ भनेर नेताहरूले भन्नुहुन्छ भने क्षमा गर्नुहोला, त्यो म गर्न सक्दिनँ, मैले त्यो काम गरेँ भने मैले विधान मिचेको हुन्छ,’ उनले भने।
सभापति थापाले कांग्रेसभित्र असन्तुष्ट नेताहरूलाई सम्मान गर्ने र संवाद जारी राख्ने प्रतिबद्धता जनाएका थिए। पार्टीभित्र देखिएको असन्तुष्टिबारे बोल्दै थापाले आगामी १५औँ महाधिवेशन सबै कांग्रेसजनको साझा महाधिवेशन हुने बताए।
विशेष महाधिवेशनमा सहभागी भएका वा नभएका आधारमा कसैमाथि विभेद नहुने उनको भनाइ थियो।
‘सबै साथीहरू १५औँ महाधिवेशनमा सहभागी हुन्छन्। कसैको नाममा विभेद गर्न मिल्दैन, गरिँदैन,’ उनले भने, ‘यदि अस्ति सर्वोच्च अदालतले विशेष महाविधेशनलाई वैधानिकता नदिएको भए, मलाई र विश्वप्रकाश शर्मालाई तपाईंहरूले कारबाही गर्नुभएको थियो। हामीमाथिको कारबाही फुकुवा पनि गर्नुहुन्थ्योहोला। तर, हामी महामन्त्रीमा फर्केर विशेषका लागि भाग चाहियो भन्दैनथ्यौं। हामी बरु १५ औं महाधिवेशन छिटो गरौं भन्थ्यौं। महाधिवेशन सामना गर्न हामी कार्यकर्तामाझ जान्थ्यौं।’
उनका अनुसार पार्टीको केन्द्रीय कार्यालयसँग अब प्रत्येक सक्रिय सदस्यको विवरण डिजिटल रूपमा रहनेछ। भविष्यमा उम्मेदवार छनोटदेखि संगठनात्मक निर्णयसम्ममा सदस्यहरूको प्रत्यक्ष सहभागिता बढाइने उनले बताए। ‘अब पार्टी माथिबाट होइन, तलबाट चल्नुपर्छ। कार्यकर्ताको राय नै निर्णयको मुख्य आधार बन्नुपर्छ,’ उनले भने।
