नेपाली कांग्रेसले मोरङ क्षेत्र नम्बर ६ का क्षेत्रीय सभापति देवराज तामाङको जिम्मेवारी खोसेको छ।
पार्टीको क्रियाशील सदस्यता अद्यावधिक गर्न र गराउन इन्कार गर्दै आएका नेता शेखर कोइरालानिकट क्षेत्रीय सभापति तामाङको जिम्मेवारी खोसेर चुमनारायण तबदारलाई दिइएको कांग्रेस केन्द्रीय कार्यालय स्रोतले सेतोपाटीलाई जानकारी दिएको छ।
मोरङ ६ शेखर कोइरालाको गृह क्षेत्र हो।
उनको क्षेत्रमा रहेका उनीनिकट नेताहरूले पार्टी सदस्यता अद्यावधिक नगर्ने अडान राख्दै आएका थिए।
‘उहाँले पार्टी सदस्यता अद्यावधिक गर्नुभएन। अद्यावधिक नगरेपछि उहाँसँग एनसी आइडी छैन,’ कांग्रेस केन्द्रीय कार्यालय स्रोतले भन्यो, ‘एनसी आइडी नभएपछि उहाँले नयाँ सदस्यको एप्रुभ गर्न मिलेन। त्यसैले एप्रुभ गर्ने जिम्मा चुमनारायण तवदारलाई दिने निर्णय भएको छ।’
सोमबार पार्टी केन्द्रले यस्तो निर्णय गरेको हो।
तर यसबारे आफूलाई कुनै जानकारी नभएको सभापति तामाङले बताए।
आफूले पार्टी क्रियाशील सदस्यता अद्यावधिक गरिसकेको दाबीसमेत उनले गरेका छन्। ‘मलाई यसबारे केही जानकारी छैन। मैले समयमै पार्टी सदस्यता अद्यावधिक गरेको छु।’
उनले आफू मोरङको सुन्दरहरैंचा नगरको मेयर बन्ने तयारीका साथ जनताको काममा रहेको तर प्रतिष्पर्धीहरुले गलत हल्ला चलाएको आरोप लगाए।
‘समय आएपछि पार्टी सदस्यता अद्यावधिक गरेको प्रमाण पनि सार्वजनिक गरौंला,’ उनले भने, ‘केन्द्रमा यसको रेकर्ड होला।’
