राष्ट्रिय स्वतन्त्र पार्टी (रास्वपा) को भर्खरै सम्पन्न केन्द्रीय समितिको निर्वाचनमा फेरि अर्को समस्या आएको छ।
महाधिवेशन प्रतिनिधिहरूको नामावलीमा आएको समस्याले एक दिन ढिलो गरी बल्लतल्ल सम्पन्न निर्वाचनमा प्रवास प्रतिनिधिहरूको मतदानले नयाँ समस्या निम्त्याएको सम्बन्धित नेताहरूले बताएका छन्।
रास्वपाको विधान अनुसार प्रवास कमिटीका प्रतिनिधिहरूले विदेशबाट मोबाइल एपमार्फत् मतदान गर्ने व्यवस्था छ। प्रवास कमिटीमा १६३ जना भोट हाल्न योग्य महाधिवेशन प्रतिनिधिहरू रहेको बताइएको छ। तर पार्टीका प्रदेश सभापतिहरूले प्रवास कमिटीबाट मोबाइल एपमार्फत गरिने मतदानमा असहमति जनाइरहेका छन्।
सातै जना प्रदेश सभापतिहरूले प्रवास कमिटीको भोटिङमा असन्तुष्टि जनाएपछि केन्द्रीय समितिको मतदान सकिए पनि गणना सुरू हुन नसकेको केन्द्रीय निर्वाचन आयोगका एक सदस्यले जाानकारी दिए।
रास्वपाको पहिलो महाधिवेशनअन्तर्गत पहिलो चरणमा ९९ जना केन्द्रीय सदस्य पदका लागि निर्वाचन भएको हो। निर्वाचनमा २९५९ जनाले मतदान गरेका छन्।
रास्वपाले महाधिवेशनमा कति महाधिवेशन प्रतिनिधि सहभागी रहे भन्ने औपचारिक तथ्यांक सार्वजनिक गरेको छैन। नेताहरूका अनुसार ४३११ जना प्रतिनिधि थिए। यसलाई आधार मान्ने हो भने रास्वपा पहिलो चरणको निर्वाचनमा १३ सयभन्दा धेरै प्रतिनिधिले मत खसालेनन्।
प्रवक्ता मनीष झाले महाधिवेशन स्थलमा पत्रकारहरूसँग कुराकानी गर्दै धेरै महाधिवेशन प्रतिनिधि घर फर्किएको चर्चाबीच यतिको संख्या मतदानमा सहभागी हुनुलाई सन्तोषजनक रूपमा लिनुपर्ने बताएका छन्।
