राष्ट्रिय स्वतन्त्र पार्टी (रास्वपा) को केन्द्रीय समितिको निर्वाचनमा प्रवास कमिटीका प्रतिनिधिहरूलाई मतदान गराउने सहमति भएको छ।
रास्वपाको विधान अनुसार प्रवास कमिटीका प्रतिनिधिहरूले विदेशबाट मोबाइल एपमार्फत् मतदान गर्ने व्यवस्था छ। प्रवास कमिटीमा १६७ जना भोट हाल्न योग्य महाधिवेशन प्रतिनिधिहरू रहेको बताइएको छ।
पार्टीका प्रदेश सभापतिहरूले प्रवास कमिटीबाट मोबाइल एपमार्फत गरिने मतदानमा असहमति जनाएपछि विवाद निम्तिएको थियो।
सातै जना प्रदेश सभापतिले प्रवास कमिटीको भोटिङमा असन्तुष्टि जनाएपछि केन्द्रीय समितिको मतदान सकिए पनि गणना सुरू हुन सकेको थिएन।
रास्वपाको पहिलो महाधिवेशनअन्तर्गत पहिलो चरणमा ९९ जना केन्द्रीय सदस्य पदका लागि निर्वाचन भएको हो। निर्वाचनमा २९५९ जनाले मतदान गरेका छन्।
रास्वपाले महाधिवेशनमा कति महाधिवेशन प्रतिनिधि सहभागी रहे भन्ने औपचारिक तथ्यांक सार्वजनिक गरेको छैन। नेताहरूका अनुसार ४३११ जना प्रतिनिधि थिए। यसलाई आधार मान्ने हो भने रास्वपा पहिलो चरणको निर्वाचनमा १३ सयभन्दा धेरै प्रतिनिधिले मत खसालेनन्।
प्रवक्ता मनीष झाले महाधिवेशन स्थलमा पत्रकारहरूसँग कुराकानी गर्दै धेरै महाधिवेशन प्रतिनिधि घर फर्किएको चर्चाबीच यतिको संख्या मतदानमा सहभागी हुनुलाई सन्तोषजनक रूपमा लिनुपर्ने बताएका छन्।
