राष्ट्रिय स्वतन्त्र पार्टी (रास्वपा) को पदाधिकारी चयनमा सर्वसम्मत नभए महामन्त्री पदका लागि निकै कडा प्रतिस्पर्धा हुने देखिएको छ।
रास्वपा विधान अनुसार एक जना महामन्त्री खुला प्रतिस्पर्धाबाट आउने छन् भने एक जना मनोनीत हुने छन्।
पहिलो चरणमा भएको केन्द्रीय समिति निर्वाचनको मत परिणाम सार्वजनिक भएसँगै महामन्त्रीका आकांक्षीहरू धमाधम खुल्न थालेका छन्।
अहिलेसम्म कम्तिमा ९ जनाले यो पदका लागि आकांक्षा देखाएका छन्।
मनीष झा, शिशिर खनाल, विपिन आचार्य र कबिन्द्र बुर्लाकोटीले यसअघि नै महामन्त्री पदमा दाबी गर्दै आएका छन्। यसबाहेक विवेकशील साझाबाट रास्वपामा समाहित भएकी रञ्जु दर्शानाले पनि आफ्नो उम्मेदवारी घोषणा गरेकी छन्।
त्यस्तै, गणेश पराजुली, सागर ढकाल, गणेश कार्की र प्रमोद न्यौपानेले पनि महामन्त्रीको आकांक्षा देखाएका छन्।
केन्द्रीय कमिटी सदस्यहरूको अन्तिम मतपरिणाम र विजयी नामहरू सार्वजनिक भएसँगै नेताहरूले पदाधिकारी तहमा आफ्नो आकांक्षी प्रस्ट पारेका हुन्।
निर्वाचनको तय भएको तालिका बमोजिम बिहीबार राति १२ बजेपछि पदाधिकारी चयन गर्न भोटिङ सुरू गर्ने योजना छ। यद्यपि मतदान सुरू हुनु अगावै सबै पदाधिकारीलाई सर्वसम्मत ढंगबाट टुंगो लगाउन शीर्ष तहमा सघन छलफल भइरहेको स्रोत बताउँछ।
आपसी सहमति र समझदारी कायम हुन नसके मात्र महामन्त्री लगायतका अन्य पदाधिकारीको चुनाव हुनेछ।
पार्टी विधान अनुसार एक सभापति, दुई उपसभापति, एक महामन्त्री र तीन सह-महामन्त्री पदका लागि चुनाव हुने व्यवस्था छ। सभापतिमा रवि लामिछाने निर्विरोध निर्वाचित भइसकेका छन्।
