राष्ट्रिय स्वतन्त्र पार्टी (रास्वपा) को केन्द्रीय समिति निर्वाचनपछि पदाधिकारी चयनको सकस सुरू भएको छ।
पहिलो चरणमा सम्पन्न केन्द्रीय समिति निर्वाचनको मत परिणाम सार्वजनिक भएसँगै अब दोस्रो चरणमा हुने पदाधिकारी निर्वाचनका लागि आकांक्षीहरू बढ्दै गएका छन्।
पार्टीको संशोधित विधान अनुसार पदाधिकारी संख्या १९ जनाको छ। यसमध्ये सभापतिसहित ७ जनाको मात्र निर्वाचन हुने व्यवस्था छ।
सभापतिमा रवि लामिछाने निर्विरोध निर्वाचित भइसकेकाले बाँकी ६ जना पदाधिकारीका लागि मात्र मतदान हुनेछ। वरिष्ठ नेतामा प्रधानमन्त्री बालेन शाह सहित १२ जना पदाधिकारी मनोनीत हुने छन्।
निर्वाचन हुने पदाधिकारीमा एक उपसभापति (खुला), एक महिला उपसभापति, एक महामन्त्री (खुला), दुई सह-महामन्त्री (खुला) र एक महिला सह-महामन्त्री छन्।
यी पदका लागि उम्मेदवारी घोषणा गरेर प्रतिस्पर्धामा ओर्लिएका अधिकांश नेता सभापति रवि लामिछाने समूहका छन्। उनीहरूलाई सहमति गराएर सर्वसम्मत रूपमा पदाधिकारी छनौटको प्रयास पनि भइरहेको स्रोत बताउँछ।
सर्वसम्मत नभएको अवस्थामा उपसभापति (खुला) तर्फ स्वर्णिम वाग्ले र विराजभक्त श्रेष्ठबीच प्रतिस्पर्धा हुनेछ। दुवैले उम्मेदवारी घोषणा गरिसकेका छन्।
खुलातर्फको महिला उपसभापतिमा कानुनमन्त्री सोबिता गौतम र डा. तोसिमा कार्कीले उम्मेदवारी घोषणा गरिसकेका छन्।
यसबाहेक पूर्वउपसभामुख इन्दिरा राना मगर र चुनावअघि विवेकशील साझाबाट आएकी समीक्षा बाँस्कोटाले पनि उपसभापतिमा प्रतिस्पर्धा गर्न सक्ने चर्चा छ।
सबभन्दा कडा प्रतिस्पर्धा महामन्त्री पदका लागि हुने देखिएको छ।
केन्द्रीय समिति निर्वाचनको मत परिणाम सार्वजनिक भएसँगै महामन्त्रीका आकांक्षीहरू धमाधम खुल्न थालेका छन्।
अहिलेसम्म कम्तिमा ९ जनाले यो पदका लागि आकांक्षा देखाएका छन्। मनीष झा, शिशिर खनाल, विपिन आचार्य र कबिन्द्र बुर्लाकोटीले यसअघि नै महामन्त्री पदमा दाबी गर्दै आएका छन्।
यसबाहेक विवेकशील साझाबाट रास्वपामा समाहित भएकी रञ्जु दर्शनाले पनि उम्मेदवारी घोषणा गरेकी छन्।
त्यस्तै, गणेश पराजुली, सागर ढकाल, गणेश कार्की र प्रमोद न्यौपानेले पनि महामन्त्रीको आकांक्षा देखाएका छन्।
खुला प्रतिस्पर्धाबाट छानिने तीन जना (महिलासहित) सह-महामन्त्रीमा पनि धेरैले आकांक्षा देखाएका छन्।
अहिलेसम्म हरि ढकाल, यज्ञमणि न्यौपाने, रमेश प्रसाईं, पुकार बम, जगदिश खरेल, सुलभ खरेल, ज्वाला संग्रौला, असीम शाह, रिमा विश्वकर्मा लगायतको नाम चर्चामा छ।
पार्टी पदाधिकारीहरूमध्ये कोषाध्यक्ष एक जना, सह-कोषाध्यक्ष दुई जना (एक महिला), प्रवक्ता एक जना र सह-प्रवक्ता तीन जना (एक महिला) रहने व्यवस्था छ। यी ७ जना पदाधिकारी सभापतिले मनोनीत गर्ने छन्।
सभापति लामिछानेले मंगलबार बन्द सत्र आरम्भ गर्ने क्रममा सबैलाई मिलाएर लैजाने प्रयास भइरहेको बताएका थिए।
'पार्टीको पहिलो महाधिवेशन भएकाले सहमतिमा सबैलाई मिलाएर लैजाने कोसिस भइरहेको छ,' उनले भने, 'तर छनोटको विधिले मलाई एकदमै गाह्रो हुन्छ। कसलाई छान्ने? एउटालाई छाने अर्को छुटिहाल्छ। त्यसैले प्रतिस्पर्धा गर्नुपर्ने अवस्था आयो भने स्वस्थ रूपमा प्रतिस्पर्धा गर्नू। जसले जिते पनि घन्टीवाहकले जित्ने हो। त्यसैले प्रतिस्पर्धामा जानुपर्ने अवस्था आए गुट-उपगुटमा नलाग्नू,' उनले भनेका थिए।
उनले मनमुटाव छन् भने त्यसलाई कोठामा बसेर छलफल गर्न पनि आह्वान गरेका थिए। 'सडकमा तमासा बनाउने होइन। समस्या भए सुल्झाऊँ, सडकमा तमासा नबनाऔं,' उनको भनाइ थियो।
