गृहमन्त्री सुधन गुरूङले लागुऔषधको आपराधिक जालोलाई भत्काउन कानुन कार्यान्वयनमा कडाइ गरी सबै संरचना परिचालन गर्ने बताएका छन्।
अन्तर्राष्ट्रिय लागुऔषध दुरूपयोग तथा अवैध ओसारपसार विरूद्धको दिवसको अवसरमा उनले आपराधिक जालो भत्काउनका लागि सबै कानुनी संरचना परिचालन गर्ने सन्देश दिएका हुन्।
‘लागुऔषधको ओसारपसार र दुरूपयोग केबल सामाजिक विकृति मात्र होइन; यो राष्ट्रिय सुरक्षा, आर्थिक नोक्सानी र जनस्वास्थ्यलाई कमजोर बनाउने एक जटिल तथा सीमा वारपार हुने संगठित अपराध हो,’ उनले भनेका छन्, ‘यस्ता आपराधिक जालो भत्काउन कानुनको कार्यान्वयनमा कडाइ गरी सबै संरचना परिचालन गरिनेछ। अन्तर निकाय समन्वय बढाइनेछ र कानूनी सुधारका काम निरन्तर हुनेछ।’
गृह मन्त्रालयले लागुऔषध दुर्व्यसनी मुक्त समाजको लक्ष्यमा पुग्ने गरी काम गरिने पनि उनले बताएका छन्।
‘लागुऔषध दुर्व्यसनी मुक्त समाजको लक्ष्यमा पुग्न मन्त्रालयले तीन वटै काममा प्राथमिकता दिएको छ: रोकथाम गर्न, नियन्त्रण गर्न र दुर्व्यसनीमा फसेकालाई उपचार गरी समाजमा पुनर्स्थापन गर्न,’ उनले भनेका छन्, ‘यो सामाजिक चुनौतिको समाधान सरकारको एक्लो प्रयासले मात्र सम्भव छैन। तसर्थ, स्थानीय समुदायले अथुवाइ गर्न र युवा पुस्तालाई सकारात्मक जीवनशैली तर्फ उन्मुख गराउन नागरिक समाज र सञ्चारमाध्यमलाई सामाजिक साझेदारीका लागि समेत पुन: आह्वान गर्दछु।’
