राष्ट्रिय स्वतन्त्र पार्टी (रास्वपा) को उपसभापतिमा सोबिता गौतम र तोसिमा कार्कीबीच प्रतिस्पर्धा हुने भएको छ।
पार्टीको केन्द्रीय निर्वाचन आयोगले शुक्रबार बिहान सार्वजनिक गरेको पदाधिकारी उम्मेदवारको प्रारम्भिक सूची अनुसार उपसभापति (महिला) तर्फ दुवैले आफ्नो उम्मेदवारी यथावत् राखेका छन्। यो पदमा अन्य केही नाम पनि चर्चामा थिए। तर उनीहरूले आफ्नो उम्मेदवारी दर्ता गरेनन्।
केन्द्रीय सदस्यमा सोबिताले २ हजार ६४१ मत ल्याएकी थिइन्। उनी स्वर्णिम वाग्लेपछि बढी भोट ल्याउने दोस्रो उम्मेदवार हुन्।
तोसिमाले २ हजार ३०२ मत पाएकी छन्।
पार्टीको संशोधित विधान अनुसार पदाधिकारी संख्या १९ जनाको छ। यसमध्ये सभापतिसहित ७ जनाको मात्र निर्वाचन हुने व्यवस्था छ।
सभापतिमा रवि लामिछाने निर्विरोध निर्वाचित भइसकेकाले बाँकी ६ जना पदाधिकारीका लागि मात्र मतदान हुनेछ। वरिष्ठ नेतामा प्रधानमन्त्री बालेन शाह सहित १२ जना पदाधिकारी मनोनीत हुने छन्।
निर्वाचन हुने पदाधिकारीमा एक उपसभापति (खुला), एक महिला उपसभापति, एक महामन्त्री (खुला), दुई सह-महामन्त्री (खुला) र एक महिला सह-महामन्त्री छन्।
आयोगले सार्वजनिक गरेको सूची अनुसार उपसभापति (खुला) तर्फ स्वर्णिम वाग्लेको मात्र उम्मेदवारी परेको छ। यो पदमा दाबी गरेका विराजभक्त श्रेष्ठले उम्मेदवारी फिर्ता लिएसँगै वाग्ले निर्विरोध निर्वाचित भएका छन्।
सबभन्दा रोचक र तीव्र प्रतिस्पर्धा महामन्त्री पदमा देखिएको छ।
महामन्त्री पदका लागि पार्टीका प्रमुख नेताहरू सहित १० जनाको प्रारम्भिक उम्मेदवारी दर्ता भएको छ।
महामन्त्रीका उम्मेदवारमा कबिन्द्र बुर्लाकोटी, प्रमोद न्यौपाने, राजुनाथ पाण्डे, मनिष झा, जगदीश खरेल (ललितपुर), रञ्जु दर्शना, गणेश कार्की, गणेश पराजुली, सागर ढकाल र विपिन कुमार आचार्य रहेका छन्।
सूचीमा नाम भए पनि जगदीश खरेलले उम्मेदवारी फिर्ता लिइसकेका छन्।
सह-महामन्त्री (खुला) तर्फ दुई पदका लागि प्रारम्भिक सूचीमा ११ जनाको नाम समेटिएको छ।
यसमा रमेश प्रसाईं, यज्ञमणि न्यौपाने, सुलभ खरेल, असीम शाह, अशोक कुमार चौधरी, मिलन लिम्बु, पुकार बम, राजिव खत्री, विजय जैरू, हरि ढकाल र हिमेश पन्त छन्।
त्यसैगरी, सह-महामन्त्री (महिला) को एक सिटका लागि ५ जना चुनावी मैदानमा छन्।
यो पदका लागि जुली यादव, जमुना शर्मा (विदुषी), कामिनी कुमारी चौधरी, निशा डांगी र रिमा विश्वकर्माको उम्मेदवारी परेको छ।
पार्टीको केन्द्रीय निर्वाचन आयोगका अनुसार दाबी विरोध र नाम फिर्ता लिने समय समाप्त भएपछि अन्तिम सूची प्रकाशन गरिनेछ।
