राष्ट्रिय स्वतन्त्र पार्टी (रास्वपा) का महामन्त्री पदका उम्मेदवार गणेश कार्कीले सभापति रवि लामिछानेले अरूका लागि भोट माग्ने पार्टीको पक्का सदस्य नभएको बताए पनि अहिले त्यो भनाइलाई खिल्ली उडाइएको बताएका छन्।
महामन्त्रीका उम्मेदवारहरूले धमाधम उम्मेदवारी फिर्ता गरी महामन्त्री विपिनकुमार आचार्यलाई समर्थन गर्न थालेपछि अर्का उम्मेदवार कार्कीले सभापति लामिछानेले महाधिवेशन उद्घाटन सत्रको भनाइ सम्झिएका हुन्।
‘यही अधिवेशनमा सभापतिले उदघाटन गर्दै भन्नुभएको थियो, अर्काको लागि भोट माग्ने रास्वपाको पक्का सदस्य हैन। सभापतिको भनाइ सेलाउन नपाई उम्मेदवारी फिर्ता लिएर अर्कोलाई समर्थन गरिएको छ। त्यसले सभापतिको भनाइलाई खिल्ली उडाउँछ,’ उनले भने, ‘यसले हामीले खराब भनेको गठबन्धनको, प्यानलको झल्को दिन्छ। यो गलत भयो। यसो नगरौं।’
उनले नेतृत्वले जालझेल गर्ने र गुट बनाउने काम गर्न नहुने पनि बताएका छन्। यसरी प्रतिनिधिहरूको लोकतान्त्रिक चुनावमा भाग लिने अधिकार खोस्न नहुने पनि उनले बताए।
‘चुनाव आउँछ, जान्छ तर पार्टीको विधि, नीति र चरित्र अलिक लामो हुन्छ। त्यसलाई बलियो बनाउने काम नेतृत्वको हो। नेतृत्वले जालझेल गर्ने र गुट बनाउने काम गर्नु हुन्न। हाम्रा कारणले पसिना बगाउँदै, नभएका पैसा सक्दै बसेका प्रतिनिधिहरूको लोकतान्त्रिक चुनावमा भाग लिने अधिकार खोस्न हुन्न,’ उनले भने।
यसअघि महामन्त्रीकै उम्मेदवार मनिष झाले पनि उम्मेदवारी दिएर फिर्ता लिने जस्तो आलोकाँचो राजनीति गर्न नहुने टिप्पणी गरेका थिए।
महामन्त्रीको पदमा उम्मेदवारी दिएका शिशिर खनाल, जगदिश खरेल, प्रमोद न्यौपाने, गणेश पराजुली, कविन्द्र बुर्लाकोटी, रञ्जु दर्शना र राजुनाथ पाण्डेले उम्मेदवारी फिर्ता गरेका छन्। अब मनिष झा, गणेश कार्की, विपिनकुमार आचार्य र सागर ढकालबीच प्रतिस्पर्धा हुने देखिएको छ।
