राष्ट्रिय स्वतन्त्र पार्टी (रास्वपा) को प्रथम महाधिवेशनमा महामन्त्रीका लागि उम्मेदवारी दिएका नेता मनिष झाले पार्टी सभापति रवि लामिछानेको भनाइ विपरीत समूहगत राजनीतिक अभ्यास भइरहेको बताएका छन्।
महाधिवेशन स्थलमा पत्रकारहरूसँग कुरा गर्दै झाले भने, 'रवि दाइले यहाँ आएर समूहगत राजनीतिक अभ्यास नगर्नू है भन्नुभएको थियो। उहाँकै छायामा कसैले गर्दै हुनुहुन्छ भने सभापतिज्यूलाई जानकारी छैन, तर उहाँको नाम बदनाम गरिरहेको छ कसैले भनेर पनि हामीले सोच्न सक्छौं।'
यसअघि महामन्त्री पदमा उम्मेदवारी घोषणा गरेका कबिन्द्र बुर्लाकोटी, गणेश पराजुली, जगदीश खरेल, रञ्जु दर्शना र प्रमोद न्यौपानेले उम्मेदवारी फिर्ता लिएका थिए। उनीहरूले महामन्त्रीकै अर्का उम्मेदवार विपिन कुमार आचार्यलाई समर्थन गर्दै उम्मेदवारी फिर्ता लिएको सन्दर्भमा मनीषको यस्तो टिप्पणी आएको हो।
यी पाँच जनाबाहेक शिशिर खनाल र राजुनाथ पाण्डेले पनि उम्मेदवारी फिर्ता लिएका छन्।
'जे गर्न हुँदैन भनिन्छ, त्यही हुनु नराम्रो हो,' उनले अगाडि भने, 'चुनाव भनेको 'फास्ट मुभिङ' प्रक्रिया हो, त्यसमा यस्तो हुन्छ। यसलाई स्वाभाविक रूपमा लिनुपर्छ।'
यो घटनालाई लिएर कसैको नेतृत्वमा प्रश्न उठाउनुभन्दा यो समयले सिर्जना गरेको अवस्था थियो भनेर बुझ्नुपर्ने पनि झाले बताएका छन्।
उनले महामन्त्री पदमा आफूले सबभन्दा पहिला उम्मेदवारी दिएको र आफ्नो उम्मेदवारी कायम रहेको पनि उल्लेख गरे। कसैको फोन आएकै भरमा आफूले उम्मेदवारी फिर्ता नलिने उनले बताए।
उम्मेदवारी फिर्ता लिएकाहरूप्रति लक्ष्य गर्दै उनले 'यस्तो आलोकाँचो राजनीति' नगर्न आग्रह गरेका छन्।
'यो महाधिवेशनमा सबभन्दा पहिले उम्मेदवारी घोषणा गरेको मैले हो, महामन्त्रीमा उठ्छु भनेर। त्यसमा मेरो उम्मेदवारी यथावत् छ,' उनले भने, 'यस्तो आलोकाँचो राजनीति पनि गर्न भएन, हिजो बेलुकी उम्मेदवारी दिने अहिले फिर्ता लिने।'
परिणाम जेसुकै भए पनि सशक्त रूपमा भिडिराख्ने उनको भनाइ छ।
'फलानोको फोन आएपछि सोचौंला र सोधौंला भन्ने राजनीति हुँदैन,' उनले भने, 'म सशक्त रूपमा लागेको छु र अघि बढेको छु।'
रास्वपा महामन्त्री पदमा अहिले मनिष झा, विपिन कुमार आचार्य, सागर ढकाल र गणेश कार्की प्रतिस्पर्धा गर्दै छन्।
