सुकुम्बासी राखिएको होल्डिङ सेन्टर खाली गर्ने सरकारको तयारीमाथि राष्ट्रिय सभामा सांसदहरूले विरोध जनाएका छन्।
विपक्षी दलहरू नेपाली कम्युनिस्ट पार्टी र नेकपा एमालेका सांसदहरुले स्थायी व्यवस्था नगरी होल्डिङ सेन्टर खाली गर्न नहुने भन्दै सरकारलाई सचेत गराएका हुन्।
नेपाली कम्युनिस्ट पार्टीकी सांसद रेनु चन्दले सुकुम्बासीलाई व्यवस्थापन गर्छु भनेर भोट मागेकाहरूले कुर्सीमा पुगेपछि भने उनीहरूको उठीबास लगाएको बताइन्।
'होल्डिङ सेन्टरबाट लखेट्ने काम गर्दैछ। हामी नयाँ हौं हर समस्याको समाधान गर्ने जादुयी क्षमता छ भन्ने अनी सुकुम्बासीको मानवअधिकार हनन गर्ने? यो सरकारमा वैचारिक स्पष्टता छैन। सीमाबारे गैरजिम्मेवार टिप्पणी गर्छ। संघीयतासँग खेलबाड गर्न खोज्छ र प्रधानमन्त्री फेसबुकमा मस्करी गरेर बस्छन्। यो दीग्भ्रमित सरकारले देशलाई कुन भड्खालोमा लाने हो भन्ने चिन्ता भएको छ,' उनले भनिन्।
कुनै मन्त्रीले खान लागेको अमलेटमा काँडा भेटिएको घटनामा तीन लाख जरिबाना हुँदा सुकुम्बासीको खानामा किरा भेटिँदा सरकारलाई कारबाही हुन्छ कि हुँदैन भनेर पनि उनले सोधेकी छन्।
कांग्रेस सांसद विष्णुकुमारी सापकोटाले २५ हजार रूपैयाँ दिएर होल्डिङ सेन्टर खाली गराउनु न्यायोचित नहुने बताइन्।
'काठमाडौंमा डेरा पाउन सजिलो छैन। त्यसमाथि अहिलेको महँगी धेरै कठिनाइ छ। गरीब भएर जन्मनु नागरिकको दोष होइन।सुकुम्बासीमाथि अमानवीय व्यवहार गर्दैछ,' उनले भनिन्।
'सुरक्षित स्थानबाट डोजर लगाएर सडकमा ल्याउनी, अनी स्थायी बसोबासको आश्वासन दिएर होल्डिङ सेन्टरमा राख्ने र त्यहाँबाट पनि व्यवस्थापन बिना नै निकालेपछि अब जाने कहाँ? यति धेरै गैरजिम्मेवार हुन सरकारलाई सुहाउँछ?,' उनको प्रश्न थियो।
नेकपाकै सांसद विष्णुबहादुर विश्वकर्माले २५ हजार रूपैयाँ गोजीमा हाल्दिएर लखेटि्नु संविधान र मानवअधिकारको उल्लंघन भएको बताए।
'स्थायी व्यवस्थापन नभएसम्म होल्डिङ सेन्टरबाट नहटाइयोस्,' उनले भने।
नेकपाकै सांसद श्रीकृष्णप्रसाद अधिकारीले पूर्वयोजना नभई सुकुम्बासी बस्तीमा डोजर चलाएर गल्ती गरेको सरकारले अर्को गम्भीर गल्ती गर्न लागेको बताए।
'खबरदारी गर्न चाहन्छु। आवास र रोजगारको स्थायी व्यवस्थापन नभएसम्म यो वर्षातको समयमा बालबालिका अशक्त बिरामी असहाय गरिब सुकुम्बासी जनतालाई शिविरबाट लखेटेर सडकमा अलपत्र पार्ने काम तुरून्त बन्द गरियोस्,' उनले भने।
नेकपाकै सांसद साबित्री मल्लले होल्डिङ सेन्टरमा ९३ प्रतिशत महिला, ४४ प्रतिशत दीर्घरोगी रहेको र उनीहरूले औषधी पनि खान नपाएको बताइन्।
