परराष्ट्र मन्त्री शिशिर खनालले नेपालको मुस्ताङ जिल्लामा भएको युरेनियम खानी उत्खनन गर्ने विषयमा सांसदले उठाएको प्रश्नमा जबाफ दिएका छन्।
राष्ट्रिय सभाको बैठकमा सांसद भुवनबहादुर सुनारले नेपाली सेना र अमेरिकी सेनाबीच युरेनियम उत्खनन् गर्ने सहमति भएको भन्ने विषयमा प्रश्न सोधेक थिए।
'नेपालको मुस्ताङ जिल्लामा ठूलो परिणामा युरेनियम धातु रहेको र त्यसको उत्खननन् गर्न नेपाली सेना र अमेरिकी सेनाबीचमा सहमति भएको भन्ने सार्वजनिक भएको थियो', सुनारले सोधे, 'त्यसको वास्तविकता के हो?'
जबाफमा परराष्ट्र मन्त्री खनालले सार्वजनिक चर्चामा कुनै सत्यता नभएको बताए।
'मुस्ताङ जिल्लामा युरेनियम धातुको उत्खनन् गर्न नेपाली सेना र अमेरिकी सेनाबीच सम्झौता भएको भन्ने सार्वजनिक चर्चाको विषयमा कुनै सत्यता नभएको जानकारी गराउन चाहान्छु', खनालले भने, 'यो क्षेत्रमा खानी उत्खनन् सम्बन्धी कसैसँग कुनै प्रकारको सहमति र सम्झौता भएको छैन। यससम्बन्धमा केही डिजिटल मिडियामा गरिएका आधारहिन दाबी नेपाल सरकारको सम्बन्धित निकायले खण्डन गरेको छ।'
