नेपाली कांग्रेसका नेताहरू विमलेन्द्र निधि, शशांक कोइराला र प्रकाशमान सिंहबीच आज छलफल भएको छ।
समसामयिक राजनीतिक घटनाक्रम र कांग्रेसभित्रको विषयमा उनीहरूबीच निधि निवासमा कुराकानी भएको हो।
नेता निधिको सचिवालयले दिएको जानकारीअनुसार छलफल मुख्य गरी दुई विषयमा केन्द्रित रह्यो।
पहिलो, सत्तारूढ रास्वपाको प्रथम महाधिवेशनमा पारित प्रतिवेदनसँग सम्बन्धित छ।
रास्वपा उपसभापति स्वर्णिम वाग्लेले प्रदेश सभा खारेजीसम्बन्धी प्रस्ताव रास्वपा बन्द सत्र महाधिवेशनमा पेस गरेका थिए। त्यसलाई लिएर कांग्रेससहित दलका नेताहरूले विरोध गरिरहेका छन्। रास्वपाले प्रदेश सभा खारेजी भन्दै संघीयता नै खारेज गर्न खोजेको अर्थमा दलहरूले विरोध गरिरहेका हुन्।
तर रास्वपा महामन्त्री विपिनकुमार आचार्यले सभापति रवि लामिछानेले महाधिवेशनमा पेस गरेको प्रतिवेदनमा यस्तो कुनै विषय समावेश नरहेको र सभापतिकै प्रतिवेदन अन्तिम हुने अभिव्यक्ति दिइसकेका छन्।
यस्तो अवस्थामा कांग्रेस नेताहरू निधि, कोइराला र सिंहबीचको छलफलमा भने 'रास्वपा चितवन महाधिवेशनमा पेस प्रतिवेदनमा प्रदेश सभा खारेज गर्ने, राष्ट्रिय सभा निर्दलीय बनाउने र निर्वाचन प्रणाली एकाङ्की गर्ने भन्नेजस्ता विषय आएको' भन्दै आपत्ति प्रकट भएको छ।
‘संसदीय प्रणालीलाई समाप्त गर्ने उद्देश्यबाट रास्वपामा यस्ता प्रस्ताव आएको हुन सक्छ, यस्ता प्रस्ताव कांग्रेस र देशका लागि चिन्ताको विषय हुन्,’ छलफलमा उठेको विषयबारे जानकारी दिँदै निधिको सचिवालयले भनेको छ, ‘संघीय लोकतान्त्रिक गणतन्त्रको पक्षमा एकपटक फेरि सचेत र संगठित हुन देशभरका कार्यकर्ता र अरू दलको ध्यानाकर्षण गराउने तथा त्यसको अग्रसरता कांग्रेस पार्टीले लिने भन्ने कुरा भएको छ।’
छलफलमा पार्टीभित्रको मतभेदका विषयमा पनि कुरा उठेको थियो।
१५ औं महाधिवेशन एकताको महाधिवेशनका रूपमा होस् भन्ने निधि, कोइराला र सिंहको चाहना छ। त्यसका लागि १४ औं महाधिवेशनबाट आएको पक्षलाई पनि सहमतिमा ल्याउनुपर्नेमा उनीहरू छन्।
‘सहमतिका लागि संस्थापन पक्षलाई निवर्तमान कार्यवाहक सभापति पूर्णबहादुर खड्कामार्फत् हामीले प्रस्ताव पठाएका छौं,’ उनीहरूले भनेका छन्, ‘एकताबद्ध रूपमा १५ औं महाधिवेशन सम्पन्न गरिनुपर्छ।’
क्रियाशील सदस्यताका सम्बन्धमा पनि सहमतिसाथ अघि बढ्नुपर्ने भएकोले खड्कामार्फत् नै संस्थापन पक्षको ध्यानाकर्षण गराइएको नेताहरूको भनाइ छ।
साथै निधि, कोइराला र सिंहले १५ औं महाधिवेशन तयारीका लागि चुनदेवीमा कार्यालय खोल्ने र यसै साता शुभारम्भ गर्नेसमेत निर्णय संस्थापनइतर समूहभित्र भएको बताएका छन्।
प्रदेश भेलाहरू सकिएकोले अब राष्ट्रिय भेला आह्वान गर्न शुक्रबार खड्का निवासमा छलफल गरेर थप निर्णयमा पुगिने उनीहरूको भनाइ छ।
यो पनि- कांग्रेसभित्र मतभेद अन्त्य गर्न पूर्ण र शेखरको प्रस्ताव- १११ नेतालाई केन्द्रीय सदस्य र एकता समिति
