प्रमुख प्रतिपक्षी दल नेपाली कांग्रेसकी सांसद सीता थपलिया (उर्मिला) ले मुगुका गणेश नेपालीले आत्मदाह गरेको घटनामा प्रधानमन्त्री बालेन्द्र शाहले मौनतामाथि प्रश्न सोधेकी छिन्।
उनले प्रेम आचार्यले नयाँ बानेश्वरमा संसद भवन अगाडि आत्मदाह गर्दा स्ट्याटस लेखेका बालेनको गणेश नेपालीले आत्मदाह गरेको घटनामा नबोलेकोमा प्रश्न गरेकी हुन्।
'प्रेम आचार्यले नयाँ बानेश्वर संसद भवन अगाडि आत्मदाह गर्दा काठमाडौँ महानगरका तत्कालीन मेयर बालेन साहले लेख्नुभएको स्टाटस आज पनि सम्झनुभएको छ कि बिर्सिनुभयो, प्रधानमन्त्रीज्यू', थपलियाले भनिन्, 'तर प्रधानमन्त्री ज्यु, आज मौन हुनुहुन्छ। हिजो प्रश्न गर्ने तपाईं अहिले कहा के गर्दै हुनुहुन्छ?'
उनले प्रधानमन्त्री शाहको शासनकालमा गरिबले बाँच्न नपाउने हो भन्दै प्रश्न गरिन्।
'म तपाईंकै भाषामा सोध्न चाहन्छु—प्रधानमन्त्रीज्यू, के राज्य साँच्चिकै यति निरीह र असफल भइसकेको हो कि आफ्ना पीडा सुनाउन नागरिकले आफ्नै शरीरमा आगो लगाएर मर्नु पर्ने अवस्था आउँछ ? यदि होइन भने, यस्ता हृदयविदारक घटनाहरू किन पटक–पटक दोहोरिइरहेका छन्', थपलियाले भनिन्, 'तपाईंको शासनमा गरिबले बाँच्न नपाउने हो प्रधानमन्त्रीज्यू? मेयर हुँदा गरिबका साइकल लुटेर नष्ट गर्नुभयो। प्रधानमन्त्री हुँदा आज सुकुम्बासीको घर भत्काउनुभयो तर व्यवस्थापन गर्नुभएन। आज दैनिक मजदुरी गरेर खाने मान्छे बाँच्न नसक्ने बनाउनुभयो। यो सहर कसका लागि ?'
उनले प्रधानमन्त्रीलाई कालो चस्मा खोल्न आग्रह पनि गरिन्।
'अब कालो चस्मा खोल्नुस। सिंहदरबारका प्रतिवेदनले होइन, सडकमा छरिएको नागरिकको पीडाले देशको वास्तविक अवस्था देखाउँछ। प्रचारका रङले यथार्थ ढाक्न सकिँदैन', थपलियाले भनिन्, 'साझा यातायातको हरियो बसलाई निलो पोतेर नागरिकले सुरक्षा महसुस गर्दैनन्। सुरक्षा तब महसुस हुन्छ, जब राज्यले न्याय दिन्छ, रोजगारी सिर्जना गर्छ, सुशासन कायम गर्छ र नागरिकमा भविष्यप्रतिको भरोसा जगाउँछ। यदि रङ फेर्दैमा देश सुरक्षित हुने हो भने बस मात्र होइन, सिंगो देशलाई नै निलो रङले रंगाइदिनुहोस्। तर सत्य के हो भने रङले होइन, जिम्मेवार शासन, संवेदनशील नेतृत्व र प्रभावकारी राज्य संयन्त्रले नागरिकको जीवन सुरक्षित बनाउँछ।'
उनले सवारी साधनमा लगाएको चर्को हर्जाना ठिक भए नभएको गणेश नेपालीको शरिरलाई हेरेर निर्धारण गर्न सुझाव दिइन्।
