नेपाली कांग्रेसले प्रवासी नेपालीहरूलाई पार्टी संगठनमा आबद्ध गर्ने अभियानलाई तीव्रता दिँदै क्रोएसिया र चेक रिपब्लिकमा नयाँ जनसम्पर्क समिति गठन गरेको छ।
कांग्रेसका प्रवक्ता देवराज चालीसेको युरोप भ्रमणको अवसरमा यी दुवै देशमा समिति विस्तार गरिएको हो।
समिति गठनमा कांग्रेसका युवा नेता विष्णु क्षेत्री, पोल्याण्डका संस्थापक अध्यक्ष डा. एलिनी पोखरेल सुवेदी, बेल्जियमका नेता ध्रुवराज पौडेल र हिरादेवी शर्माले महत्वपूर्ण भूमिका निर्वाह गरेका थिए।
क्रोएसियामा हरिबहादुर तामाङको अध्यक्षतामा २५ सदस्यीय तदर्थ समिति गठन गरिएको छ भने चेक रिपब्लिकमा एन्जिला सिंह थापा क्षेत्रीको अध्यक्षतामा १५ सदस्यीय तदर्थ समिति गठन भएको छ। दुवै समितिले सदस्यता विस्तार गर्दै आगामी साउन महिनाभित्र अधिवेशन सम्पन्न गर्ने लक्ष्य राखेका छन्।
कांग्रेसको विधानअनुसार विदेशमा जनसम्पर्क समिति गठन गरी प्रवासी नेपालीहरूलाई पार्टीसँग जोड्ने व्यवस्था छ। विश्वभर छरिएका नेपाली जनशक्तिलाई संगठित गर्न यो कदम चालिएको हो।
