कर्णाली प्रदेशका मुख्यमन्त्री यामलाल कँडेलविरूद्ध अविश्वास प्रस्ताव दर्ता भएको छ।
नेपाली कांग्रेस र नेपाली कम्युनिष्ट पार्टीका सांसदहरूले मुख्यमन्त्रीविरूद्ध आज अविश्वास प्रस्ताव दर्ता गरेका हुन्।
कांग्रेसका ५ र नेकपाका १० गरी कूल १५ जना सांसदहरूले मुख्यमन्त्रीविरूद्ध अविश्वास प्रस्ताव दर्ता गराएको कांग्रेस सांसद सुरेश अधिकारीले सेतोपाटीलाई जानकारी दिए।
कांग्रेसका ४ जना मन्त्रीहरूले बुधबार सामूहिक रूपमा पदबाट राजीनामा दिएका थिए। त्यसपछि एमाले संसदीय दल नेतासमेत रहेका मुख्यमन्त्री कडेल नेतृत्वको सरकार संकटमा परेको थियो।
‘हामीले मुख्यमन्त्रीविरूद्ध अविश्वास प्रस्ताव राखेका छौं, कांग्रेस संसदीय दल नेता जीवनबहादुर शाहीलाई नयाँ मुख्यमन्त्रीमा अघि सारेका छौं,’ उनले भने।
कांग्रेसले प्रदेशहरूमा नेकपा एमालेसँगको गठबन्धनलाई निरन्तरता नदिने भन्दै नेकपालगायत दलसँग मिलेर सरकार गठनको जमर्को गरेको छ।
कर्णाली प्रदेश सभा ४० सदस्यीय हो।
