त्रिभुवन विश्वविद्यालयले मानविकी तथा सामाजिक शास्त्र संकायअन्तर्गत बिए प्रथम वर्ष २०८१ सालतर्फको ०८२ मा हुनुपर्ने आंशिक परीक्षाको परीक्षाफल प्रकाशनमा ढिलाइ गरेको विद्यार्थीहरूले गुनासो गरेका छन्।
२०८१ सालतर्फको परीक्षा ०८२ मा हुन नसकी ०८३ जेठमा सम्पन्न भएको थियो।
उक्त परीक्षामा दुई हजार ४ सय ३० जना परीक्षार्थी सहभागी थिए।
त्रिविमा वार्षिक परीक्षा प्रणालीमा अस्वाभाविक ढिलाइ देखिने विद्यार्थीहरूको भनाइ छ।
परीक्षा नियन्त्रण कार्यालय बल्खुले २०८१ सालतर्फको वार्षिक परीक्षाका रूपमा सञ्चालन गर्नुपर्ने परीक्षाका लागि ०८२ भदौ र कात्तिकमा विद्यार्थीको आवेदन फारम लिएको थियो।
तर परीक्षा तालिका २०८३ वैशाख ३ गते मात्र सार्वजनिक भयो। जसअनुसार जेठ १८ गतेदेखि २७ गतेसम्म परीक्षा चलेको थियो।
परीक्षा नियन्त्रण कार्यालयले आंशिक र मौका दुवैतर्फका परीक्षा एउटै मिति र समयमा सञ्चालन गरेको थियो।
विद्यार्थीहरूले असारभित्रै नतिजा प्रकाशन हुने अपेक्षा गरेका थिए।
एक-दुई विषयको नतिजा कुरिरहेका विद्यार्थी उच्च शिक्षा, रोजगारी, प्रवेश परीक्षा, छात्रवृत्ति तथा विदेश अध्ययनका अवसरबाट बञ्चित हुनुपर्ने अवस्था सिर्जना भएको उनीहरूको गुनासो छ।
‘परीक्षा सञ्चालनमै एक वर्ष लाग्यो। अब नतिजाका लागि पनि महिनौँ पर्खनुपर्ने हो भने विद्यार्थीको शैक्षिक वर्ष र भविष्यको जिम्मेवारी कसले लिन्छ?’ सेतोपाटीको सम्पर्कमा आएका एक परीक्षार्थीले भने।
हामीले यसबारे परीक्षा नियन्त्रक लक्ष्मण पौडेलसँग कुराकानी गरेका छौं। उनले उक्त परीक्षाको परीक्षाफल भदौमा प्रकाशन गर्ने तयारी रहेको जानकारी दिए।
‘यौ मौका परीक्षा थियो, जेठको अन्तिममा सकिएको थियो, अहिले धेरै परीक्षाहरू भएका छन्, सकेसम्म साउन नभए भदौमा परीक्षाफल आउँछ,’ परीक्षा नियन्त्रक पौडेलले सेतोपाटीसँग भने।
परीक्षाफल प्रकाशनमा ढिलाइबारे सोधिएको प्रश्नमा उनले भने, ‘क-कसको बाध्यता छ हामीले पनि बुझेका छौं, हामीले सकेको छिटो गर्छौं। यति गते परीक्षाफल प्रकाशन हुन्छ भनेर अहिले भन्न मिल्दैन।’
