नेपाली कांग्रेसका निवर्तमान सभापति शेरबहादुर देउवा पक्षले बिपी स्मृति दिवसमा छुट्टै कार्यक्रम गर्ने भएका छन्।
संस्थापन पक्षले ग्रीन रनलगायत विभिन्न कार्यक्रम गर्ने तयारी गरेका बेला देउवा पक्षले काठमाडौंमै बेग्लै कार्यक्रम गर्न लागेका हुन्।
चुनदेवीस्थित सम्पर्क कार्यालयमा आज पत्रकार सम्मेलन गर्दै नेता मीनबहादुर विश्वकर्माले साउन ६ गते ४४ औं बिपी स्मृति दिवसमा कार्यक्रम गर्न लागिएको जानकारी गराएका हुन्।
‘नेपाली कांग्रेसका संस्थापक नेता एवं प्रथम जननिर्वाचित प्रधानमन्त्री विश्वेश्वरप्रसाद कोइरालाको ४४ औँ स्मृति दिवस आगामी साउन ६ गते काठमाडौंको प्रज्ञा भवनमा भव्य रूपमा मनाउने निर्णय गरिएको छ,’ नेता विश्वकर्माले भने, ‘कार्यक्रम व्यवस्थापनका लागि पूर्वउपसभापति प्रकाशमान सिंहको संयोजकत्वमा एक आयोजक समिति गठन गरिएको छ।’
उनकाअनुसार सोही कार्यक्रममार्फत् राष्ट्रिय भेलाको मिति, समय र स्थान सार्वजनिक गरिनेछ। गत पुसमा भएको विशेष महाधिवेशनमा सहभागी नरहेका देउवा समूहले प्रदेश भेलाहरू गरिसकेर अब राष्ट्रिय भेला गर्न लागेका हुन्।
पार्टीको आन्तरिक विवाद र वर्तमान राजनीतिक अवस्थाबारे समीक्षा गर्दै साउन महिनाभित्र काठमाडौंमा ‘राष्ट्रिय भेला’ आयोजना गर्ने तयारी गरिएको पनि उनले जानकारी दिए।
देउवा समूहले पार्टी एकताका लागि गरिएका प्रयासहरू सार्थक हुन नसकेको र नेतृत्वले एकलौटी ढंगले अघि बढ्न खोजेको पनि आरोप लगाएको छ।
‘पार्टीभित्र एकता कायम गर्न पटक–पटक छलफल भए पनि नेतृत्व तहबाट आवश्यक लचकता र तत्परता नदेखिँदा सहमति जुट्न सकेको छैन,’ उनले भने, ‘झगडा कहिले अन्त्य हुन्छ भन्ने निश्चित हुँदैन, तर मेलमिलापको आशा भने सधैं रहन्छ। यही विश्वासका साथ वार्ता र छलफल निरन्तर भइरहेका छन् तर आजसम्म ती छलफल सार्थक र उपलब्धिमूलक हुन सकेका छैनन्। त्यसैले एकताको सम्भावना कमजोर बन्दै गएको निष्कर्षमा हामी पुगेका छौँ।’
आजको पत्रकार सम्मेलनमा नेताहरू विमलेन्द्र निधि, शशांक कोइराला, प्रकाशमान सिंह, कृष्णप्रसाद सिटौला, प्रकाशशरण महतलगायत उपस्थित थिए।
