नेपाली कांग्रेसका नेता नैनसिंह महरले पार्टीको सुदृढ एकता र सशक्त संगठनले मात्र मुलुकले सामना गरिरहेका राजनीतिक, सामाजिक तथा आर्थिक चुनौतीहरूको प्रभावकारी रूपमा सामना गर्न सक्ने बताएका छन्।
बीपी कोइराला स्मृति दिवसको अवसरमा स्कुल अफ डेमोक्रेसीले काठमाडौंमा आयोजना गरेको कार्यक्रममा बोल्दै नेता महरले वर्तमान परिस्थितिमा देश, जनता तथा सम्पूर्ण कांग्रेसीहरूको आत्मसम्मानको रक्षा गर्नु सबैको साझा जिम्मेवारी भएको उल्लेख गर्दै त्यसका लागि व्यक्तिगत हठ, कुण्ठा, पूर्वाग्रह र गुटगत सोच त्यागेर साझा उद्देश्यका साथ अघि बढ्नुपर्नेमा जोड दिए।
उनले बीपी कोइरालाले प्रतिपादन गरेका प्रजातन्त्र, समाजवाद र राष्ट्रियताका आदर्श आज पनि उत्तिकै सान्दर्भिक रहेको उल्लेख गर्दै ती आदर्शलाई व्यवहारमा उतार्न कांग्रेसभित्र आपसी विश्वास, सहकार्य र अभूतपूर्व एकता अपरिहार्य रहेको बताए।
महरले कांग्रेस केही नेताहरूको मात्र पार्टी नभई करोडौं नेपालीको आशा, विश्वास र लोकतान्त्रिक आन्दोलनको विरासत बोकेको संस्था भएको उल्लेख गर्दै समयको पदचाप र जनअपेक्षाअनुसार पार्टीलाई रूपान्तरण गर्न सबैको आत्मसम्मानको कदर हुने वातावरण निर्माण गर्नुपर्ने धारणा राखेका थिए।
उनले लोकतन्त्र, संविधान, राष्ट्रियता तथा सामाजिक सद्भावविरुद्ध देखापर्ने हरेक प्रकारका अतिवादी र विभाजनकारी प्रवृत्तिको सशक्त प्रतिवाद गर्न कांग्रेसभित्र बृहत् समझदारी, आपसी विश्वास र अभूतपूर्व एकता कायम गर्नु आजको प्रमुख आवश्यकता भएको बताए।
कार्यक्रममा बीपी कोइरालाको लोकतान्त्रिक दर्शन, राष्ट्रिय एकता र समाजवादसम्बन्धी विचारमाथि विभिन्न वक्ताहरूले चर्चा गर्दै उनका आदर्शलाई व्यवहारमा उतार्दै नेपाली कांग्रेसलाई थप एकताबद्ध, सशक्त र जनमुखी बनाउनु समयको आवश्यकता रहेको धारणा व्यक्त गरेका थिए।
