दिल्ली उच्च अदालतले निट परीक्षामा भएको अनियमितताको विरूद्ध अनसन बसेका शिक्षाविद् तथा सामाजिक अभियानी सोनम वाङ्चुकलाई मेदान्ता अस्पतालमा सार्न अनुमति दिएको छ।
वाङ्चुकको तर्फबाट उनकी पत्नी गीताञ्जली अङ्मोले आइतबार आफ्नो रोजाइको अस्पतालमा सार्न अनुमति माग्दै दिल्ली उच्च अदालतमा निवेदन दिएकी थिइन्।
सोही निवेदनको सुनुवाइ गर्दै उच्च अदालतले आफ्नो पक्षमा आदेश दिएको भन्दै सामाजिक सञ्जाल (ट्वीट) मा उल्लेख गरेकी छन्।
'माननीय दिल्ली हाई कोर्टप्रति मेरो हृदयदेखि नै आभार, जसले सोनम वाङ्चुकलाई हाम्रो रोजाइको अस्पताल मेदान्तामा भर्ना गर्ने पक्षमा आदेश दियो,' उनले भनेकी छन्, 'म अखिल सिब्बल, बहुली शर्मा र उहाँहरूको सम्पूर्ण टिमलाई पनि हृदयदेखि नै धन्यवाद दिन्छु, जसले अत्यन्तै चुनौतीपूर्ण परिस्थितिका बाबजुद रेकर्ड समयमा यो कानुनी जित हासिल गराइदिनुभयो।'
गीताञ्जलीले आइतबार (बिदाको दिन) निवेदन दिए पनि उच्च अदालतले तुरून्तै सुनुवाइ गर्न स्वीकार गरेको थियो। तर, त्यस दिन यस मामिलामा कुनै अन्तरिम आदेश दिएको थिएन। बरू तीन दिनभित्र वाङ्चुकको 'स्टेटस रिपोर्ट' (अवस्थाबारे प्रतिवेदन) पेस गर्न निर्देशन दिएको थियो।
निट (NEET) परीक्षामा भएको भनिएको अनियमितताको विरोधमा शिक्षाविद् तथा सामाजिक अभियानी सोनम वाङ्चुक जुन २८ देखि दिल्लीको जन्तर-मन्तरमा भोक हडतालमा बसिरहेका छन्।
शनिबार बिहान प्रहरीले उनलाई त्यहाँबाट हटाएको थियो।
