नेकपा एमालेका नेता शेरबहादुर तामाङले प्रदेश सरकारमा नेपाली कांग्रेससँगको सत्ता सहकार्य अन्त्य भएमा एमाले प्रतिपक्षमा बस्ने बताएका छन्।
मंगलबार काठमाडौंमा आयोजित एक कार्यक्रममा उनले एमाले नयाँ समीकरण खोजेर सरकारमा नजाने बताए।
उनले प्रदेश सरकारमा देखिएको पछिल्लो राजनीतिक अस्थिरता नेपाली कांग्रेसको आन्तरिक विवादका कारण उत्पन्न भएको दाबी गरे।
उनले कांग्रेसभित्रको मतभेद छिट्टै समाधान हुने विश्वास व्यक्त गर्दै एमालेको प्राथमिकता वर्तमान सरकारको निरन्तरता कायम राख्नु रहेको स्पष्ट पारे।
उनले एमाले तत्काल अन्य दलसँग मिलेर नयाँ सरकार गठनको प्रयासमा नलाग्ने दाबी गरे। वर्तमान सरकार टिक्न नसके एमाले सरकारबाट बाहिरिने र प्रतिपक्षको भूमिकामा रहने उनको भनाइ छ।
उनले भने, ‘प्रदेश सरकारमा अहिले समस्याहरू देखापरेको छ, त्यो नेपाली कांग्रेसको आन्तरिक समस्याको कारणले सिर्जना भएको हो। यो खटपट अब धेरै नजाला, यसको छिट्टै समाधान होला। कांग्रेसभित्र केही आन्तरिक सहमति होलान्, सहमति हुँदैन भने हामी अहिले तुरून्तै अरू कसैसँग हात मिलाउने भन्दा पनि वर्तमान सरकारलाई जोगाउने ठाउँमा उभिन्छौँ, अहिलेको सरकार जोगिएनन् भने हामी सरकारको निरन्तरतामा रहँदैनौं। अरू क–कसको बन्छ, बनोस्, हामी सरकारका रहँदैनौं, अरू पार्टीहरुको बीचमा सरकार बन्न सक्छ।’
वर्तमान सरकार नरहेको खण्डमा एमाले बाहेकको सरकार प्रदेशमा बन्नसक्ने बताए।
हाल कर्णाली र सुदूरपश्चिम प्रदेश सरकारमा देखिएको समस्याका कारण प्रदेशमा कांग्रेस–एमाले बीचको सत्ता समीकरण अन्योलमा परेको छ। सुदूपश्चिमका मुख्यमन्त्री कमल बहादुर साहले एमालेका मन्त्रीहरूलाई बर्खास्त गरेका छन् भने कर्णालीमा कांग्रेसका सांसदहरूले मुख्यमन्त्री यमलाल कँडेल विरूद्ध अविश्वासको प्रस्ताव दर्ता गराएका छन्। –न्युज एजेन्सी नेपाल
