पूर्वमन्त्री सुमना श्रेष्ठले सरकारलाई स्वास्थ्य र शिक्षामा लगाएको ३ प्रतिशत कर हटाएकोमा धन्यवाद दिएकी छन्। साथै आगामी दिनमा निर्णय गर्नुअघि तथ्यांक हेर्न सुझाएकी छन्।
सामाजिक सञ्जाल इन्स्टाग्रामा राष्ट्रिय तथ्यांक कार्यालयले प्रकाशित गरेको नेपाल जीवनस्तर सर्वेक्षणको तथ्यांक राख्दै पूर्वमन्त्री श्रेष्ठले लेखेकी छन्, 'धारणा राख्नुअघि म जीवनस्तर सर्वेक्षणको (सन् २०२२–२०३३) को तथ्यांक हेर्न आग्रह गर्दछु।'
'हामीलाई सधैँ भनियो- सरकारी विद्यालयमा गरिबहरू जान्छन्, गरिबहरू सरकारी अस्पताल जान्छन्, धनीहरू निजी विद्यालयमा पढ्छन् र निजी अस्पतालमा जान्छन्,' सुमनाले लेखेकी छन्, 'झूट, झूट, झूट। राजनीति गर्नेहरूले हामीलाई ध्रुवीकरण गर्न दिमागमा यस्तो हालिदिए।'
उनले यस्तो जनता लडाउन ध्रुवीकरणको राजनीति गर्नेहरूलाई तथ्यांक र प्रमाण माग्नुपर्ने उल्लेख गरेकी छन्।
साथै, उनले तथ्यांक समेत राखिदिएकी छन्।
राष्ट्रिय तथ्यांक कार्यालयको पछिल्लो जीवनस्तर सर्वेक्षण प्रतिवेदन अनुसार नेपालका २५.५ प्रतिशत गरिबले सरकारी अस्पतालमा उपचार गराउँछन् भने २६.९ प्रतिशत अन्य व्यक्तिले (नन पोअर) ले सरकारी अस्पतालमा उपचार गराउँछन्।
तथ्यांक अनुसार ६.८ प्रतिशत गरिब स्वास्थ्य चौकीमा उपचारका लागि जान्छन् भने ३ प्रतिशत गरिबको मापदण्डमा नपरेकाहरू स्वास्थ्य चौकी जान्छन्।
त्यस्तै, ११.४ प्रतिशत गरिबले फार्मेसीहरूमा उपचार गराउँछन् भने ०.७ प्रतिशत उपस्वास्थ्य चौकीमा जान्छन्। जबकि, गरिबको सूचीभन्दा बाहेकका ६.७ प्रतिशत फार्मेसीमा उपचारका लागि पुग्छन् र ०.९ प्रतिशत उपस्वास्थ्य चौकीमा जान्छन्।
तथ्यांक अनुसार २५.५ प्रतिशत गरिब नेपाली निजी लगानीका अस्पतालमा उपचार गराउँछन् भने ३७.४ प्रतिशत अन्य व्यक्तिहरू (नन पोअर) ले निजी अस्पतालमा उपचार गराउँछन्।
त्यसैगरी ९.७ प्रतिशत गरिब क्लिनिकमा जान्छन् भने गरिबको सूचीमा नपर्ने ११.८ प्रतिशत मानिस क्लिनिकमा जान्छन्।
तथ्यांक अनुसार विदेशमा उपचार गराउने गरिबको संख्या ३.७ प्रतिशत छ भने गरिबीमा नपर्ने २.२ प्रतिशत गरिबीमा नपर्ने मानिस विदेशमा उपचारका लागि पुग्छन्। १६.२ प्रतिशत गरिबहरू उपचारका लागि स्वास्थ्य संस्थामै जाँदैनन् भने ९.२ प्रतिशत गरिबीभन्दा माथि रहेका व्यक्तिहरू स्वास्थ्य संस्थामा जाँदैनन्।
सुमना सरकारलाई सूक्ष्म तथ्यांक नै उपलब्ध रहेको अवस्थामा सरकारले त्यस्तो तथ्यांक प्राप्त गरेर निर्णय गर्नु उचित हुने सुझाएकी छन्।
'कुनै पक्षमा उभिनु सही होला तर त्यसरी पक्षधरता लिनुअघि तथ्यांक माग्नुस्,' सुमनाले प्रश्न गरेकी छन्, 'के हामी अझै पक्षधरता लिँदा थाकेका छैनौं?'
