नेपाली कांग्रेसको इतर समूहले बिपी कोइरालाको ४४औँ स्मृति दिवसका अवसरमा आयोजना गरेको कार्यक्रममा औपचारिक रूपमा पार्टी एकताको आवश्यकता दोहोर्याए पनि अधिकांश नेताको अभिव्यक्तिमा भने पार्टी विभाजन तर्फ तयारीको संकेत गरेका छन्।
कमलादीस्थित प्रज्ञा भवनमा जारी कार्यक्रममा नेताहरुले बोल्ने क्रम जारी छ।
अहिलेसम्म कार्यक्रममा बोल्ने नेताहरूमध्ये केहीले कांग्रेसलाई बलियो बनाउन एकता अपरिहार्य रहेको बताए पनि गगन थापाको नेतृत्वमा नयाँ पार्टी गठन गर्नुपर्ने, सहमतिको सम्भावना समाप्त भएको र नेतृत्वले अब नयाँ बाटो रोज्नुपर्ने धारणा सार्वजनिक गरेका हुन्।
नेता एनपी साउदले कांग्रेसभित्रको संकट समाधानका लागि सबै पक्ष एक हुनुपर्नेमा जोड दिए।
उनले पार्टीभित्रको विभाजनले कांग्रेस कमजोर बनेको उल्लेख गर्दै भने, ‘निर्वाचन आयोग र अदालतले निर्णय गरे पनि राजनीतिक रूपमा कांग्रेसलाई एक नबनाएसम्म संकटको सामना गर्न सक्दैन।
४४ औँ बीपी स्मृति दिवसमा हामीले एकताको कुरा गरेका छौं। त्यसका लागि एकताबद्ध कांग्रेस जरुरी छ।’
‘यहाँ आउनेहरु दास र लास होइनन्, भरोसा र विश्वास हुन्,’ कार्यक्रममा उपस्थितहरूतर्फ संकेत गर्दै उनले अगाडि भने, ‘त्यसैले विशेषमा जाने हुन् वा नजाने, सबैले मिल्नुपर्छ। मिलेर मात्रै लडाइँ जित्न सकिन्छ।’
अर्का नेता डा. प्रकाशशरण महतले सभापति गगन थापा एक्लै पार्टी चलाउन सक्छु भन्ने भ्रममा रहेको आरोप लगाए। अहिले पार्टी एकताको कुरा अपरिहार्य रहेको तर त्यो कसरी भन्ने महत्वपूर्ण हुने उनको भनाइ थियो।
‘बृहत एकता त्यसै हुन्छ?,’ उनले सोधे ‘त्यसका लागि सम्मानजनक एकता चाहिँदैन ? यदि त्यस्तो अवस्था आएन भने जस्तोसुकै निर्णयतिर अघि बढ्नुपर्ने अवस्था आउनसक्छ।’
त्यसअघि बोलेका नेता मोहन बस्नेतले भने नयाँ पार्टी गठनको तयारी गर्नुपर्ने धारणा राखे।
उनले प्रदेशस्तरका भेला सम्पन्न भइसकेको भन्दै अब केन्द्रीय भेला गरेर नयाँ दल निर्माणतर्फ अघि बढ्नुपर्ने बताए।
‘प्रदेश भेला गरिसक्यौं। आज केन्द्रीय भेला राख्नुपर्छ, पार्टी फुटाउने होइन, अर्को पार्टी बनाउने हो। गगन थापाको नेतृत्वमा लोकतान्त्रिक शक्तिलाई सती जान दिइनेछैन,’ उनले भने।
कोशीका पूर्वमुख्यमन्त्री केदार कार्कीले पनि सहमतिको सम्भावना नरहेको संकेत गर्दै नेतृत्वलाई वैकल्पिक राजनीतिक बाटोका लागि तयार रहन आग्रह गरे।
उनले गगन थापामाथि विभिन्न आरोप लगाउँदै भने, ‘हामी अहिले सम्झिन्छौं, गिरिजाप्रसाद कोइरालाले त्यसबेला भनेको कुरा। गगन थापा कहिँबाट सञ्चालित छन् भन्ने प्रमाणित हुँदै छ। नाङ्गो आँखाले देखिँदै छ।’
-1784708350.jpg)
