त्रिपुरेश्वरको राहदानी विभाग अगाडि ज्यान गुमाएका गणेश नेपालीको परिवारसँग गरिएको सम्झौता अनुसार सरकारले न्यायिक छानबिन समिति गठन गरेको छ।
मन्त्रिपरिषदको बुधबारको बैठकले गणेश नेपालीको मृत्युको घटनाबारे सत्यतथ्य छानबिन गर्न उच्च अदालतका पूर्वन्यायाधीश केशवप्रसाद बास्तोलाको अध्यक्षतामा न्यायिक समिति गठन गरेको मन्त्रिपरिषद प्रवक्ता एवं शिक्षा तथा खेलकुद मन्त्री सस्मित पोखरेलले जानकारी दिए।
यसअघि जिल्ला प्रशासन कार्यालय, काठमाडौं महानगरपालिका र पीडित पक्षबीच असार २८ गते भएको ९ बुँदे सहमतिमा छानबिन समिति गठन गर्ने बुँदा उल्लेख थियो। उक्त ९ बुँदे सहमतिपछि नै पीडित पक्ष शव बुझ्न तयार भएको हो।
सहमतिमा घटनाको सत्यतथ्य छानबिन गर्न नेपाल सरकारले पूर्वन्यायाधीशको संयोजकत्वमा एक स्वतन्त्र छानबिन समिति गठन गर्ने भनिएको थियो।
सहमति अनुसार छानबिन समितिले गठन भएको ७ दिनभित्र सरकारसमक्ष प्रतिवेदन पेस गर्नुपर्नेछ।
त्यही प्रतिवेदनका आधारमा नेपाल सरकारले गणेश नेपालीलाई सहिद घोषणा गर्न आवश्यक निर्णय प्रक्रिया अगाडि बढाउने भनिएको छ।
सहमतिपत्रमा नेपाल सरकारबाट प्रमुख जिल्ला अधिकारी ईश्वरराज पौडेल र काठमाडौं महानगरपालिकाका प्रमुख प्रशासकीय अधिकृत सरोज गुरागाईंले हस्ताक्षर गरेका थिए।
त्यस्तै, पीडित परिवार र वार्ता समितिबाट गणेशकी श्रीमती एकमाया नेपाली, आमा सौरी नेपाली, दाजु मदन नेपाली, बहिनी सुन्दरी नेपाली र वार्ता समितिका सदस्यहरू धर्मराज शाही, भक्त बहादुर रावत, मन नेपाली सहित १३ जनाले हस्ताक्षर गरेका थिए।
