नेपाली कांग्रेसका निवर्तमान कार्यवाहक सभापति पूर्णबहादुर खड्काले आफूहरूले विशेष महाधिवेशनको कार्यसमितिलाई स्वीकार गरे पनि पदका लागि बार्गेनिङ गरेको भन्ने भाष्य निर्माण गरिएको बताएका छन्।
बिपी कोइरालाको स्मृति दिवसको अवसरमा संस्थापन इतर पक्षले बुधबार आयोजना गरेको कार्यक्रममा बोल्दै उनले सभापति गगन थापालाई १४औं नियमित महाधिवेशन पक्षधर र विशेष महाधिवेशन पक्षधरलाई जोड्न अनुरोध गरेको बताए।
'हामीले विशेष महाधिवेशनको कार्यसमितिलाई मान्यौं। हामीलाई जोड्नुस्, सानेपामा राख्नुस् भनेको पद मागिएको हो? पदका लागि बार्गेनिङ गरिएको हो? हामीसँग पदैपदको भारी छ। हामी अग्रपंक्तिका नेताहरू कोही पनि निष्क्रिय बस्नेवाला छैनौं,' उनले भने, 'हामी युवाहरूलाई अगाडि सारेर, आजभन्दा सक्रिय भएर, युवाहरूको रक्षा कवच भएर बस्ने छौं। तपाईंहरू ढुक्क हुनुस्। हामी रक्षाकवच हुन तयार छौं। तपाईंको नेतृत्वमा सबै साथीहरू हिँड्न तयार छौं।’
उनले विशेष महाधिवेशनपछि नेपाली कांग्रेस दुई थरी भएको उल्लेख गर्दै सभापति थापासँगको भेटमा विशेष महाधिवेशनमा १४औं महाधिवेशन पक्षधरलाई जोडर कार्यसमितिलाई पूर्णता दिन भनेको बताए।
'१४औं महाधिवेशन पक्षधर र विशेष महाधिवेशन पक्षधर दुईथरी भएको हो कि होइन नेपाली कांग्रेस? भएको हो भने यसलाई नजोडिकन नेपाली कांग्रेस एक कसरी हुन्छ? कसैलाई पद दिएर, कसैलाई केन्द्रीय सदस्य बनाएर पार्टी एकता हुन्छ? त्यसैले हाम्रो अनुरोध पार्टीको १४औं नियमित महाधिवेशन पक्षधर र विशेष महाधिवेशन पक्षधर दुई वटा कार्यसमितिलाई जोड्नुस्,' उनले भने।
