प्रथम राष्ट्रपति रामवरण यादवले शासन व्यवस्थामा लोकतन्त्रको मर्म नबुझेका मानिसहरू छन् कि जस्तो लाग्ने बताएका छन्।
कृष्ण धरावासी सम्पादक र कुसुम बाँस्तोला प्रकाशक रहेको 'चक्रप्रसाद बाँस्तोला- बौद्धिकता र विद्रोह' पुस्तकको आज काठमाडौंको बत्तिसपुतलीमा विमोचन गर्दै प्रथम राष्ट्रपति यादवले भने, ‘मलाई लाग्यो कि अहिले शासन व्यवस्थामा लोकतन्त्रको मर्म नबुझेका मानिसहरू छन् कि, मैले भन्नुहुन्छ कि हुँदैन, अर्थमन्त्री भन्छन् संघीयता खत्तम गर्ने भनेर।’
अर्थमन्त्री स्वर्णिम वाग्लेलाई 'विद्वान' का रूपमा चिनिने गरेको उल्लेख गर्दै प्रथम राष्ट्रपति यादवले भने, ‘विद्वान मानिस छन्, विदेशमा पनि काम गरेर आएका थिए, सिकेर आए होला भनेर। देशलाई अग्रगामी छलाङ गर्छन् होला भनेको त उनको हालत त त्यो छ।’
उनले चक्र बाँस्तोलालाई आफूले एक विचारकका रूपमा लिएको पनि बताए। ‘उहाँले कडा तरिकाले आफ्नो कुरा राख्नुहुन्थ्यो,’ उनले भने, ‘म महामन्त्री भइसकेको थिएँ, चुनाव जित्थें, काम पनि गर्थें तर चक्रजीजस्तो विचारक म थिइनँ।’
उनले कांग्रेस कमजोर भएका बेला देश दुर्घटनामा परेको स्मरण पनि गरेका थिए।
‘कांग्रेसको इतिहास र देशको प्रजातान्त्रिक इतिहासलाई अवलोकन गरौं, कांग्रेस जहिल्यै फुटेको छ त्यसबेला दुर्घटना भएको छ भनेर सबैले भन्नुहुन्छ, मनन् कतिले गर्नुभएको छ, मिलाएर लैजाने कति छ,’ उनले भने।
