नेपाली कांग्रेसका नेता चन्द्र भण्डारीले पार्टीभित्रको आन्तरिक मतभेदतर्फ संकेत गर्दै मर्यादा नत्याग्न आग्रह गरेका छन्।
बिपी स्मृति दिवसमा निवर्तमान सभापति शेरबहादुर देउवा पक्षले नेपाल प्रज्ञा भवनमा गरेको कार्यक्रममा नेताहरूले दिएका अभिव्यक्तिप्रति लक्ष्य गर्दै भण्डारीले फेरि भेट हुने र त्यसबेला आफ्नै शब्द सम्झेर शिर झुकाउने अवस्था सिर्जना नगर्न आग्रह गरेका हुन्।
‘पूर्व भनेको गालीगलौज, आरोप–प्रत्यारोप र व्यक्तिगत आक्रमण होइन, बरू अनुभवको पटेरो हो। तसर्थ अनुभवबाट निर्मित विचार, विचारले खोजेको तर्क र तर्कले बढाएको प्रतिस्पर्धाले मात्र उचाइ बढाउँछ, चरित्रको हत्याले होइन। असहमति राखौं, तर मर्यादा नत्यागौं,’ सामाजिक सञ्जाल फेसबुकमा उनले लेखका छन्, ‘अन्ततः हामी फेरि एउटै चौतारीमा भेट्नु नै छ। त्यतिबेला आफ्नै शब्द सम्झेर शिर झुकाउन नपरोस्।’
उनले कांग्रेस पहिलो पुस्ताले निर्माण गरेको, दोस्रोले फोहोर बनाएको र तेस्रो पुस्ताले सफा गरिरहेको पनि उल्लेख गरेका छन्।
‘कांग्रेस पार्टी निश्चित लक्ष्य लिएर पहिलो पुस्ताले निर्माण गरेको, हजारौंले ज्यान दिएको, दोश्रो पुस्ताले इतिहास बिर्सेर फोहोर बनाएको र तेस्रो पुस्ताले सफा गर्न थालेको साझा विरासत हो। त्यसैले यो कसैको निजी सम्पत्ति होइन, सबैको साझा जिम्मेवारी हो,’ उनले भने, ‘पदले भद्रता, संयमता, धैर्यता, शिष्टता र मर्यादालाई जन्म दिनुपर्छ तर विडम्बना, कतिपय ठाउँमा पदको उचाइसँगै भाषा र व्यवहारको स्तर झन् खस्किएको देखिन्छ।’
