नेपाली कांग्रेसबाट उम्मेदवार भई २०७९ को स्थानीय चुनावमा जितेका जनप्रतिनिधिहरूले राष्ट्रिय भेला बोलाएका छन्।
उनीहरूले साउन १६ गते भेला गर्न लागेका हुन्।
नेपाली कांग्रेसभित्र मतभेद छ। गत पुसमा विशेष महाधिवेशन भएको थियो। उक्त विशेष महाधिवेशनमा निवर्तमान सभापति शेरबहादुर देउवा पक्ष सहभागी भएको थिएन। उक्त पक्षले चुनदेवीमा सम्पर्क कार्यालय खोलेर समानान्तर गतिविधि गर्दै आएको छ।
पार्टी एकतालाई दबाब दिन भन्दै कांग्रेसबाट निर्वाचित जनप्रतिनिधिहरूले राष्ट्रिय भेला गर्न लागेका हुन्।
स्थानीय तहमा कांग्रेसबाट टिकट पाएर निर्वाचित नगर प्रमुख, उपप्रमुख, अध्यक्ष, उपाध्यक्ष , वडा अध्यक्ष र सदस्यले काठमाडौंमा भेला गर्न लागेका हुन्।
बिहीबार गोकर्ण रिसोर्टमा कागेश्वरी मनोहरा नगरपालिकाका नगर प्रमुख उपेन्द्र कार्कीको सभापतित्वमा भएको नगर प्रमुखहरूको बैठकले राष्ट्रिय भेलाको निर्णय गरेको हो।
साथै उनीहरूले शीर्ष नेताहरूलाई भेटेर मिल्न सुझाव र दबाब दिने भएका छन्।
दबाब अभियानले नेपाल नगर पालिका संघका केन्द्रीय अध्यक्ष रहेका धादिङ नीलकण्ठ नगरपालिकाका नगर प्रमुख भीमप्रसाद ढुंगानालाई संयोजक तोक्दै गाउँपालिका राष्ट्रिय महासंघका अध्यक्षसमेत रहेकी हुप्सेकोट गाउँपालिकाका अध्यक्ष लक्ष्मी पाण्डेलाई सहसंयोजक तोकेको छ।
नजिकिंदो स्थानीय र प्रदेशको तहको निर्वाचन तथा पार्टी एकताका विषयमा छलफल गर्न भेला आयोजना गर्न लागिएको अभियानका संयोजक ढुंगानाले जानकारी दिए।
‘जुन पार्टीको कार्यकर्ता भएर यहाँ पुगियो त्यो पार्टी जोगाउनु हामी सबैको कर्तब्य हो। पार्टीलाई एकताबद्ध बनाउनका लागि नै हामीले देशभरका जनप्रतिनिधि काठमाडौं बोलाएर दबाब दिन खोज्दैछौं,' उनले भने।
उनले यो भेला कुनै समूहको नभई पार्टीलाई मात्र केन्द्रमा राखेर गर्न लागिएको बताए।
उनले शुक्रबारदेखि पार्टी सभापति गगन थापासहित पदाधिकारी र असन्तुष्ट नेताहरूसँग छलफल गरिने बताएका छन्।
