नेपाली कांग्रेसका सभापति गगन थापाले नागरिक जीवनसँग जोडिएका विषयलाई पार्टीको नीतिगत मुद्दा बनाउने बताएका छन्।
केन्द्रीय नीति, अनुसन्धान तथा प्रशिक्षण प्रतिष्ठानका प्रमुख तथा पार्टी उपसभापति विश्वप्रकाश शर्माको अध्यक्षतामा आज सानेपामा बसेको बैठकमा सभापति थापाले भने, ‘हरेक उपसमितिले एनसी फर एनसीको अवधारणा र अभियानसँग जोडिएर नागरिक सरोकारका मुद्दा उठाउनुपर्छ। कांग्रेसले नागरिक जीवनसँग जोडिएका विषयलाई पार्टीको नीतिगत मुद्दा बनाउँछ।’
बैठकले प्रतिष्ठानका भिन्नभिन्न उपसमितिलाई सहजीकरण गर्न पार्टी केन्द्रीय समितिका पदाधिकारी र सदस्यको जिम्मेवारी बाँडफाँड गरेको छ।
सभापति थापाले सहजीकरणको जिम्मेवारी पाएकाहरूलाई पार्टीको मुख्य दायित्व ठानेर काम गर्न आग्रह गरेका थिए।
बैठकमा मानसिक स्वास्थ्य सचेतना अभियान उपसमिति संयोजक मोहना अन्सारी, आदिवासी जनजाति संवाद समन्वय र सशक्तीकरण उपसमितिका संयोजक रेशम गुरूङ र दुर्व्यसनमुक्त समाजका लागि सचेतना र समन्वय उपसमितिका संयोजक डा. डी. बी. सुनारले विषयगत अवधारणा र कार्य योजना प्रस्तुत गरेका थिए।
प्रतिष्ठानको बैठक भोलि बिहान फेरि बस्नेछ।
